Hytaý häkimiýetleri Neuracle Technology (Shanghai) kompaniýasy tarapyndan işlenip düzülen ilkinji inwaziw (kelleçanak içine ýerleşdirilýän) «beýni-kompýuter» interfeýsini söwda maksatly ulanmaga rugsat berdi. Şeýle-de Hytaýyň Lukmançylyk önümleri boýunça milli müdirligi bu enjamy bazara çykarmak hukugyny tassyklady. Bu barada Bloomberg agentligi habar berýär.
Bu implant oňurga ýiliginiň şikeslenmegi sebäpli bölekleýin ysmaz bolan uly ýaşly hassalar üçin niýetlenendir. Kliniki synaglaryň dowamynda bu ulgam adamlaryň elinde zatlary tutmak we saklamak ukybyny gowulandyrmaga kömek etdi.
Toplum diňe bir implantdan däl-de, eýsem beýni datçikleri, robotlaşdyrylan ellik, hirurgiýa gurallary, beýni signallaryny çözüji algoritmler, lukmançylyk programma üpjünçiligi ýaly birnäçe bölekden ybaratdyr.
Maglumatlara görä, bu tehnologiýa eýýäm 36 meýletinde üstünlikli synag edildi.
Hytaýyň gözegçilik ediji edarasynyň bu karary beýni signallary arkaly elektron enjamlary dolandyrmak ugrunda işleýän hytaý kompaniýalary üçin möhüm ädim boldy. Pekin täze neýrointerfeýsleri «geljegiň pudaklarynyň» hataryna goşdy we bäş ýyla niýetlenen meýilnamanyň çäginde bu ugry goldamagy maksat edinýär.
Hytaý startaplary häzirki wagtda Ilon Maskyň Neuralink kompaniýasy ýaly amerikan ägirtleri bilen bäsleşmäge çalşyp, bu pudagy işjeň ösdürýärler. Degişli ugra goýulýan maýa goýumlary beýleki ýurtlarda hem artýar. Meselem, ABŞ-nyň Science Corp. kompaniýasy beýni implantlaryny işläp düzmek üçin ýaňy-ýakynda 230 million dollar maýa goýumyny çekdi.
