Ilon Maskyň xAI kompaniýasy Grok neýroulgamyny kämilleşdirmek üçin maliýe bilermenlerini we bankirleri işe kabul edip başlady. Kompaniýanyň şeýle etmek bilen maksady bu çat-boty çylşyrymly maliýe amallaryny, şol sanda kärhanalaryň birleşdirilmegi we satyn alynmagy ýaly amallary seljerýän gurala öwürmekdir.
Işe treýderler, karz hünärmenleri we portfel dolandyryjylary çekilýär. Olar maglumatlary taýýarlaýarlar hem-de ulgama maliýe modelirlemesini, kriptowalýuta we gazna bazarlary bilen işleşmegi öwredýärler. Bu hünärmenler «IIM-týutorlar» (AI-tutors) hökmünde çykyş edip, esasy ünsi bergi we paýdar maýasyna gönükdirýärler.
Mundan öň OpenAI kompaniýasy hem «Project Mercury» atly şuňa meňzeş taslama başlapdy. Olar iri maliýe guramalaryndan sagatlaýyn tölegine takmynan 150 dollar bermek şerti bilen, 100-den gowrak öňki bankirleri işe aldylar. Şol bir wagtda xAI-da hünärmenler sagadyna 45 dollardan 100 dollara çenli hak alýarlar.
Iki kompaniýa hem kiçi seljerijileriň ýerine ýetirýän wezipelerini — IPO seljermesini, maliýe modellerini we gaýtadan gurnamak düzgünlerini awtomatlaşdyrmaga çalyşýarlar. Grok ulgamyna obligasiýalar bilen işlemek, Excel-de modeller döretmek, söwda strategiýalaryny düzmek we blokçeýni seljermek öwredilýär.
2026-njy ýylyň başynda Grok 4.20 modeli «Alpha Arena» ýaryşynda maýanyň 10–12% artandygyny görkezdi. Bilermenleriň pikiriçe, şeýle tehnologiýalar maliýe seljerijileriniň wezipeleriniň 30%-ne çenlisini awtomatlaşdyryp we banklaryň çykdajylaryny takmynan 25% azaldyp biler.
