13-nji martda Türkmenistanyň daşary işler ministri Raşid Meredow Halkara Gyzyl Haç Komitetiniň Merkezi Aziýa boýunça sebitleýin wekilhanasynyň ýolbaşçysy Bilýana Miloşewiç bilen duşuşyk geçirdi. Bu barada Türkmenistanyň DIM-i habar berýär.
Taraplar ynsanperwer hyzmatdaşlygynyň wajyp meselelerine we geljekki gatnaşyklaryň mümkinçiliklerine garady.
Türkmen tarapy ýurduň hemişelik bitaraplyk derejesine esaslanyp, parahatçylygy, ynanyşmagy berkitmegiň tarapdary bolup çykyş edýändigini nygtady hem-de raýat ilatynyň goraglylyk meselelerine aýratyn ähmiýet berilýändigini belledi. Türkmenistanyň halkara ynsanperwer hukugynyň kadalaryna ygrarlydygy hem-de ynsanperwer işiniň bitaraplyk we garaşsyzlyk ýörelgelerini goldaýandygy tassyklanyldy.
Duşuşygyň dowamynda Prezident Serdar Berdimuhamedowyň 2028-nji ýyly «Halkara hukugynyň ýyly» diýip yglan etmek baradaky başlangyjyny durmuşa geçirmek boýunça pikir alşyldy.
Şeýle hem sebitdäki ynsanperwer ýagdaýa gözegçilik etmek, tejribe alyşmak, bilermenleriň geňeşmelerini guramak we bilelikdäki okuw çärelerini geçirmek ýaly hyzmatdaşlygy giňeltmegiň ýollary maslahatlaşyldy.
Ynsanperwer çärelerine gatnaşýan milli düzümleriň mümkinçiliklerini ýokarlandyrmaga aýratyn üns berildi.
