Türkmenistan Serbiýa Respublikasynyň Belgrad şäherinde geçiriljek «EKSPO – 2027» Bütindünýä ýöriteleşdirilen sergisine gatnaşmaga işjeň taýýarlyk görýär. Bu barada «Watan» habarlar gepleşiginde habar berildi.
Anna güni sanly ulgam arkaly geçirilen Hökümet mejlisiniň dowamynda wise-premýer N.Atagulyýew «Oýun adamzat üçin: Sport we saz hemmeler üçin» mowzugy astynda geçiriljek bu çärä görülýän taýýarlyk barada hasabat berdi. Ol Türkmenistanyň halkara sergisinde «Türkmenistan — parahatçylygyň owazy, saglygyň mekany» diýen şygar bilen çykyş etjekdigini aýtdy.
Häzirki wagtda milli pawilýonyň gurluşyk-gurnama, enjamlaşdyryş we bezeg işleri boýunça degişli işler alnyp barylýar.
Prezident Serdar Berdimuhamedow hasabaty diňläp, giň gerimli halkara forumlaryna yzygiderli gatnaşmagyň dünýä ýurtlary bilen söwda-ykdysady gatnaşyklary berkitmäge ýardam edýändigini belledi. Döwlet Baştutany bellenilen sergä ýurduň ýokary derejede gatnaşmagy bilen bagly hödürlenen teklipleri makullady hem-de wise-premýere bu taslamany amala aşyrmak ugrundaky işleri dowam etdirmegi tabşyrdy.
