Hyzmatdaşlyk boýunça Türkmen-hytaý hökümetara toparynyň ynsanperwer hyzmatdaşlyk boýunça kiçi komitetiniň 9-njy mejlisinden soň, Türkmenistanyň wekiliýeti Pekindäki Hytaýyň Milli muzeýine baryp gördi. Bu barada Türkmenistanyň Bilim ministrligi habar berýär.
Sapar wagtynda Türkmenistanyň wekilleri Hytaý senenamasy boýunça At ýylyna bagyşlanan ýörite sergi bilen tanyşdy. Bu sergi atyň Hytaýyň taryhyndaky we medeniýetindäki orny, şeýle hem onuň güýjüň, asyllylygyň, öňe tarap ymtylyşyň, harby edermenligiň we çeper ylhamyň nyşany hökmündäki simwoliki ähmiýetini açyp görkezýär.
Sergi bilen tanyşlygyň dowamynda atçylyk medeniýetiniň Ýewraziýa halklarynyň arasyndaky gatnaşyklary ösdürmekdäki orny bellenildi. Bu nukdaýnazardan, türkmen atçylyk däpleri bilen taryhy meňzeşlikler getirildi. Gadymy döwürlerden bäri Merkezi Aziýanyň iň gowy bedewlerine gözelligi, çydamlylygy we tizligi üçin ýokary baha berlendigi nygtaldy. Bu hakykat Türkmenistanyň milli baýlygy bolan ahalteke atlarynyň dünýä taryhyndaky şöhraty bilen utgaşýar.
Sergi atyň siwilizasiýanyň ösüşi bilen arabaglanyşygyna, dabaraly däp-dessurlara, bedewiň çeper keşplerine hem-de Gündogar bilen Günbataryň taryhy gatnaşyklaryna bagyşlanan mowzuklaýyn bölümlerden ybarat boldy.
Sergini gözden geçirenden soň, wekiliýet muzeýiň hemişelik bölümlerine hem baryp gördi. Ol ýerde Hytaýyň taryhynyň dürli tapgyrlaryna — neolit medeniýetinden başlap, bürünç eýýamyna we merkezleşdirilen döwletiň kemala gelen döwürlerine degişli arheologik tapyndylar görkezilýär.
Muzeýe bolan bu gezelenç türkmen wekiliýetiniň Pekindäki saparynyň medeni maksatnamasynyň bir bölegi boldy.
