Türkmen halysynyň baýramynyň çäklerinde «Türkmenhaly» döwlet birleşigi türki dünýäde halyçylyk senedini ösdürmäge goşan uly goşandy üçin Türki medeniýetiň halkara guramasynyň (TÜRKSOÝ) ýörite diplomyna mynasyp boldy. Şeýle hem pudagyň iň ussat halyçy zenanlaryna Minnetdarlyk hatlary gowşuryldy.
Dabarada TÜRKSOÝ-yň Baş sekretary Sultan Raýew çykyş edip, Türkmen halysynyň baýramynyň diňe bir türkmen halkynyň däl, eýsem bütin türki dünýäniň genji-hazynasyna bagyşlanandygyny belledi.
Ol öz çykyşynda halylaryň diňe bir dokma önümi bolman, eýsem türki halklaryň taryhy köklerini, çeper döredijiligini we ruhy baýlygyny özünde jemleýän maddy gymmatlykdygyny aýratyn nygtady. Onuň sözlerine görä, bu sungat bütindünýä medeniýetine goşulan ägirt uly goşant we gaýtalanmajak mirasdyr.
Sultan Raýew TÜRKSOÝ guramasynyň adyndan «Türkmenhaly» döwlet birleşigine we ussat halyçy zenanlara häzirki zaman şertlerinde bu gadymy senedi gorap saklamakda, ösdürmekde we kämilleşdirmekde bitiren hyzmatlary üçin tüýs ýürekden minnetdarlyk bildirdi we guramanyň ýörite diplomyny hem-de Minnetdarlyk hatlaryny dabaraly ýagdaýda gowşurdy.
Dabaraly çäreler Türkmen halysynyň baýramy mynasybetli ýurdumyzyň sungat ussatlarynyň taýýarlan uly baýramçylyk konserti bilen tamamlandy.
