Sport dünýäsiniň «Oskary» diýlip atlandyrylýan her ýylky «Laureus» baýragyna dalaş edýänleriň atlary belli boldy. Baýragyň guramaçylyk komiteti sekiz ugur boýunça dalaşgärleriň sanawyny resmi taýdan neşir etdi. Bu abraýly baýraklary gowşuryş dabarasy 20-nji aprelde Madridde geçiriler.
«Ýylyň iň oňat türgeni» diýen at ugrunda şestli belentlige bökmekde rekordlaryň eýesi Arman Dýuplantis, tennisçiler Karlos Alkaras we Ýannik Sinner, futbolçy Usman Dembele, motosikl ýaryşçysy Mark Markes hem-de welosipedçi Tadeý Pogaçar dagy bäsleşer. «Ýylyň zenan türgeni» kategoriýasynda bolsa tennisçi Arina Sobolenka, futbolçy Aýtana Bonmati, atletler Melissa Jefferson-Wuden, Feýt Kipýegon we Sidni Maklaflin-Lewron, şeýle-de suwda ýüzüji Keti Ledeki dagy hödürlendi. Ýatladyp geçsek, geçen ýyl esasy ugurlar boýunça baýraga Arman Dýuplantis bilen gimnastikaçy Simona Baýlz mynasyp bolupdy.
Mundan başga-da, dabaranyň dowamynda «Ýylyň topary», «Ýylyň açyşy», «Ýylyň gaýdyp gelşi», «Ýylyň mümkinçiligi çäkli türgeni», «Haýyr-sahawat üçin sport» we «Ekstremal görnüşler boýunça ýylyň türgeni» ýaly ugurlarda ýeňijiler yglan ediler. «Laureus» baýragy 2000-nji ýyldan bäri gowşurylyp gelýär we onuň ýeňijilerine altyndan hem-de kümüşden ýasalan, beýikligi 30 santimetr bolan ýörite heýkeljik berilýär. Şu wagta çenli bu baýraga iň köp mynasyp bolan türgen tennisçi Rojer Federerdir, onuň hasabynda jemi alty sany «Laureus» baýragy bar.
