2026-njy ýylyň 4-nji martynda Türkmenistanyň daşary işler ministriniň orunbasary Ahmet Gurbanow Koreýa Respublikasynyň daşary işler ministriniň köpçülikleýin diplomatiýa boýunça orunbasary Lim Sang-Wu bilen duşuşdy. Bu barada edaranyň metbugat gullugy habar berýär.
Gepleşikleriň dowamynda taraplar syýasy, söwda-ykdysady we medeni-ynsanperwer ugurlarda ikitaraplaýyn gatnaşyklaryň ýokary ösüş depginini belläp, halkara hem-de sebit gün tertibiniň möhüm meseleleri, şol sanda Ýakyn Gündogardaky ýagdaý boýunça pikir alyşdy. Koreýaly diplomat Eýrandan gelýän Koreýa Respublikasynyň raýatlaryna Türkmenistanyň çäginden üstaşyr geçmekde beren ýardamy üçin türkmen tarapyna aýratyn hoşallyk bildirdi.
Duşuşykda ýokary derejedäki meýilleşdirilýän saparlara taýýarlyk görmegiň, şeýle hem syýasy we konsullyk geňeşmelerini geçirmegiň ähmiýeti nygtaldy.
Söhbetdeşligiň ahyrynda taraplar iki ýurduň arasyndaky hyzmatdaşlygy mundan beýläk-de giňeltmäge ygrarlydyklaryny tassyklady.
