Biologlar mör-möjekleriň DNK-syny seljerip, çybynlaryň adamy çakmak arkaly iýmitlenip başlamagynyň takmynan 1,8 million ýyl mundan ozal Günorta-Gündogar Aziýada ýüze çykandygy baradaky netijä geldiler.
Çybynlar adam üçin iň wehimli mör-möjekler hasaplanylýar. Olar gyzzyrma we beýleki ýokanç keselleri ýaýratmak arkaly her ýyl 600 müňden gowrak adamyň heläk bolmagyna sebäp bolýarlar. Popular Science neşiriniň habar bermegine görä, täze barlaglar çybynlaryň adam gany bilen iýmitlenip başlamaklarynyň şol sebitde adamyň ilkinji ata-babalary bolan gadymy gominidleriň peýda bolan döwrüne gabat gelýändigini görkezdi.
Esasy howpy Anopheles leucosphyrus toparyna degişli çybynlar döredýär. Alymlar bu mör-möjekleriň 38 görnüşiniň DNK-syny öwrenip, möhüm genetik üýtgeşmäniň 2,9 we 1,6 million ýyl mundan ozal, häzirki Borneo, Ýawa, Sumatra we Malaýa ýarym adasynyň çäklerinde dörändigini anykladylar.
Mundan ozal çybynlar beýleki maýmynlaryň gany bilen iýmitlenipdirler. Emma wagtyň geçmegi bilen, olarda gominidleriň bedeniniň ysyny anyklamaga mümkinçilik berýän duýujylyk ösüpdir. Bu bolsa olarda täze «pidalaryň» ugruna çykmak islegini döredipdir.
Barlagçylar bu senäniň sebitde Homo erectus (dik ýöreýän adam) görnüşiniň peýda bolmagy bilen deň gelýändigini belleýärler. Bu açyş çybynlaryň ewolýusiýasyna düşünmek bilen birlikde gadymy adamlaryň ýaşan ýerleri we sany baradaky ylmy maglumatlary hem täzeleýär.
