25-nji fewralda günüň ikinji ýarymynda Türkmenistanyň daşary işler ministri Raşid Meredowyň Ýewropanyň täzeleniş we ösüş bankynyň (ÝTÖB) prezidenti Odil Reno-Basso bilen duşuşygy boldy. Bu barada Türkmenistanyň DIM-iniň metbugat gullugy habar berdi.
Gepleşikleriň dowamynda taraplar maliýe-maýa goýum hyzmatdaşlygyny giňeltmek, şeýle hem bilelikdäki taslamalary durmuşa geçirmek meselelerine seretdi. Ministr Türkmenistanyň ykdysady ösüş strategiýasynyň çäginde halkara hyzmatdaşlygyny berkitmäge hem-de iri maliýe we karz-bank düzümleri bilen gatnaşyklary işjeňleşdirmäge aýratyn üns berýändigini belledi. Şunlukda, ýurduň ÝTÖB bilen köpýyllyk özara gatnaşyklarynyň netijeli häsiýeti nygtaldy.
Bankyň prezidenti ýolbaşçylyk edýän maliýe düzüminiň Türkmenistan bilen özara bähbitli gatnaşyklary mundan beýläk-de giňeltmäge gyzyklanma bildirýändigini tassyklady.
Gündogar–Günbatar halkara ulag geçelgesini döretmek boýunça taslamalara aýratyn üns berildi. Türkmen tarapy bu ugurdaky başlangyçlara gatnaşmak boýunça ÝTÖB-iň anyk tekliplerine seretmäge taýýardygyny bildirdi.
Şeýle hem energetika pudagyndaky hyzmatdaşlygy ösdürmek ileri tutulýan ugurlaryň arasynda görkezildi. Bu nukdaýnazardan, ÝTÖB-iň durnukly energetika ulgamynda durmuşa geçirilýän taslamalara gatnaşmak mümkinçilikleri bellenildi.
Duşuşygyň netijeleri boýunça taraplar ikitaraplaýyn hyzmatdaşlygyň mundan beýläk-de yzygiderli ösdüriljekdigine ynam bildirdi we biri-birine iň gowy arzuwlaryny beýan etdi.
Türkmenistanyň DIM-iniň ýolbaşçysy ÝTÖB-iň prezidenti bilen bilelikdäki taslamalary maslahatlaşdy
- şu gün 18:11
- 492
