Türkmenistanyň daşary işler ministri Raşid Meredow Edinburg gersogy şazada Edward bilen ikitaraplaýyn gatnaşyklary berkitmek meselelerini maslahatlaşdy. Duşuşyk 25-nji fewralda Beýik Britaniýanyň DIM-iniň Lankaster-haus binasynda boldy. Bu barada Türkmenistanyň DIM-iniň metbugat gullugy habar berýär.
Taraplar döwletara gatnaşyklary ösdürmek boýunça pikir alyşdy we bilim hem-de medeniýet ulgamlaryndaky ösüşleri aýratyn belledi.
Merkezi Aziýa ýurtlarynyň daşary syýasat edaralarynyň ýolbaşçylarynyň şazada Edwardyň gatnaşmagynda geçirilen iş günortanlygynyň dowamynda köptaraplaýyn dialog üçin «Merkezi Aziýa – Beýik Britaniýa» formatyndaky ilkinji ministrler duşuşygynyň ähmiýeti nygtaldy.
Türkmen wekiliýeti syýasy we ykdysady ulgamlarda hyzmatdaşlygy giňeltmek üçin uly mümkinçilikleriň bardygyny belledi. Türkmenistanda iňlis dilini we britan medeniýetini wagyz etmäge aýratyn üns berildi. Taraplar bilim we akademik alyş-çalyşlaryň, şol sanda «Chevening» maksatnamasynyň netijeliligini belläp geçdi.
Üstünlikli hyzmatdaşlygyň mysallary hökmünde Aşgabatda Uilýam Şekspiriň ýadygärliginiň oturdylmagy, Ceilidh şotland tanslarynyň agşamynyň guralmagy, şeýle hem BBC teleýaýlymy tarapyndan Köpetdagyň alajagaplaňlary baradaky dokumental filmiň taýýarlanmagy bellenildi.
Raşid Meredow Londonda Edinburg gersogy şazada Edward bilen duşuşdy
- şu gün 12:28
- 526
