GDA-nyň Hökümet baştutanlarynyň Geňeşiniň mejlisi 22-nji maýda Aşgabatda geçiriler

Garaşsyz Döwletleriň Arkalaşygynyň (GDA) Hökümet baştutanlarynyň Geňeşiniň nobatdaky mejlisi 22-nji maýda Aşgabatda bolar. Bu barada GDA-nyň Baş sekretarynyň birinji orunbasary Igor Petrişenko Minskide geçirilen Hemişelik wekilleriň geňeşiniň mejlisinde mälim etdi diýip, THP habar berýär.
Duşuşygyň gün tertibinde 11 meseläniň ara alnyp maslahatlaşylmagy meýilleşdirilýär. Esasy ünsi ykdysady hyzmatdaşlyga, ulag geçelgeleriniň ösdürilmegine, sanlylaşdyrmaga, şeýle hem kongres-sergi işine gönükdirmek göz öňünde tutulýar. Aýratyn bellenilmeli meseleleriň biri hem 2027-nji ýylda Minske GDA-nyň ýaşlar paýtagty statusyny bermek barada bolar.
Şol bir wagtyň özünde, Arkalaşygyň çäginde kadalaşdyryjy-hukuk binýadyny täzelemek boýunça işler dowam edýär. Häzirki tapgyrda üçýyllyk meýilnamanyň ýerine ýetirilişiniň jemleri jemlenýär hem-de GDA-nyň milli edaralarynyň we pudaklaýyn düzümleriniň özara gatnaşyklaryny utgaşdyrmagyň täze çemeleşmeleri ýola goýulýar. Howpsuzlyk meselelerine-de aýratyn üns berilýär: hünärmenler döwlet Baştutanlarynyň başlangyçlarynyň durmuşa geçirilişini seljerýär we degişli düzümleriň işini ylalaşýar.
Şeýle hem, GDA-nyň 15-nji marta bellenilen Konstitusiýa üýtgetmeler girizmek boýunça referenduma gözegçilik etmek üçin Gazagystana synçylar wekiliýetini iberjekdigi habar berildi. Wekiliýetiň ştabynyň işi eýýäm başlandy.