Pudagara topary 2026-njy ýyl üçin adam hukuklary babatyndaky işleriň ileri tutulýan ugurlaryny ara alyp maslahatlaşdy

23-nji fewralda Türkmenistanyň Ministrler Kabinetiniň Başlygynyň orunbasary, daşary işler ministri Raşid Meredowyň başlyklyk etmeginde Türkmenistanyň adam hukuklary babatda halkara borçnamalarynyň we halkara ynsanperwer hukugynyň ýerine ýetirilmegini üpjün etmek boýunça pudagara toparynyň nobatdaky mejlisi geçirildi. Bu barada Türkmenistanyň DIM-iniň metbugat gullugy habar berdi.
Mejlise degişli ministrlikleriň we pudaklaýyn edaralaryň ýolbaşçylary hem-de wekilleri, Türkmenistanyň Adalatçysy, Mejlisiň, Döwlet, hukuk we demokratiýa institutynyň, Türkmenistanyň Gyzyl Ýarymaý Milli jemgyýetiniň wekilleri, şeýle hem jemgyýetçilik guramalarynyň ýolbaşçylary gatnaşdy.
Gatnaşyjylar Toparyň 2025-nji ýylda bitiren işleriniň jemlerini jemledi we 2026-njy ýyl üçin işiň esasy ugurlaryny kesgitledi. Mejlisde Türkmenistanyň Birleşen Milletler Guramasy we onuň ýöriteleşdirilen düzümleri bilen hyzmatdaşlygynyň yzygiderli ösdürilýändigi, Ýewropa Bileleşigi, Ýewropada Howpsuzlyk we Hyzmatdaşlyk Guramasy, Halkara Zähmet Guramasy hem-de Halkara Gyzyl Haç Komiteti bilen gepleşikleriň giňeldilýändigi bellenildi.
Halkara Zähmet Guramasy bilen hyzmatdaşlygyň «Ýol kartasynyň» durmuşa geçirilişine we onuň möhletiniň 2026-njy ýylyň ahyryna çenli uzaldylmagyna aýratyn üns berildi.
Şeýle hem adam hukuklary boýunça 2021–2025-nji ýyllar üçin Hereketleriň milli Meýilnamasynyň we gender deňligi boýunça Hereketleriň milli Meýilnamasynyň ýerine ýetirilmeginiň tamamlanandygy bellenildi. BMG-niň şertnamalaýyn edaralarynyň tekliplerini, Ählumumy döwürleýin synyň dördünji tapgyrynyň maslahatlaryny we Durnukly ösüş maksatlaryny nazara almak bilen, 2026–2030-njy ýyllar üçin täze meýilnamalaryň taslamalary taýýarlanyldy.
Mejlisiň ahyrynda Toparyň işiniň netijeliligini ýokarlandyrmak, milli hasabatlary taýýarlamagyň hilini gowulandyrmak we halkara hyzmatdaşlar bilen gatnaşyklary mundan beýläk-de ösdürmek meseleleri maslahatlaşyldy.