Hytaýyň Fuszýan welaýatynda, deňiz derejesinden has belentde, kert gaýanyň gyrasynda ýerleşýän kofehana Hytaý Täze ýylynyň dynç alyş günlerinde iň meşhur ýerleriň birine öwrüldi. Bu ýerde kofe içmek üçin gelýänler ýörite alpinist enjamlaryny geýip, gaýanyň ýüzündäki insiz tagtanyň üstünde oturyp, mawy deňziň görnüşinden lezzet alýarlar.
Hytaýyň sosial ulgamlarynda kofe söýüjiler kofehanadaky täsin pursatlaryndan suratlardyr wideolary paýlaşýarlar. Bu üýtgeşik başdangeçirmäniň bahasy 398 ýuan (takmynan 58 dollar). Kofe we ätiýaçlandyryş, ýörite alpinist enjamlary, bir wagtyň özünde gid, ofisiant we suratçynyň işini ýerine ýetirýän instruktoryň hyzmaty hem şol tölegiň içine girýär.
Myhmanlar üçin häzirlikçe wagt çäklendirmesi ýok. Olar 60 metr töweregi belentlikde, kert gaýada berkidilen insizje tagtanyň üstünde islän wagtlaryna çenli oturyp bilýärler.
Hytaýda içerki syýahatçylyk, naharhanalar we dynç alyş merkezleriniň arasyndaky bäsdeşlik örän güýçli. Şol sebäpli kärhana eýeleri müşderileri özlerine çekmek üçin hemişe täsin we del pikirleri oýlap tapmaga çalyşýarlar.
Hünärmenler şeýle ýerlere entek trende öwrülmänkä barmagy maslahat berýärler. Sebäbi täsinlik sosial torlarda ýoň bolandan soň, uzyn nobat we mähelle zerarly, hakyky rahatlygy we lezzeti duýmak kynlaşýar.
