Düzüminde şekeriň mukdary ýokary bolan içgiler bilen ýetginjeklerdäki was-waslyk alamatlarynyň arasynda arabaglanyşyk bar. Muny Bornmut uniwersitetiniň we Beýrutdaky Liwan amerikan uniwersitetiniň alymy doktor Karim Halediň ýolbaşçylygyndaky täze barlag ýüze çykardy diýip, Medical Xpress žurnaly habar berýär.
Barlagyň awtorlarynyň biri doktor Hloýa Keýsiniň aýtmagyna görä, köpçülikleýin saglygy goraýyş başlangyçlary adatça semizlik we süýji keseli ýaly fiziki netijelere üns berýärler. Emma iýmitiň ruhy saglyga, aýratyn-da energetiki gymmaty ýokary, ýöne peýdaly maddalary az bolan içgileriň täsiri entek ýeterlik derejede öwrenilmedi.
2023-nji ýylyň maglumatlary her bäş çaganyň we ýetginjegiň biriniň ruhy bozulmalardan ejir çekýändigini görkezýär. Was-waslyk, howsala düşmeklik bolsa häzirki ýetginjeklerde iň köp duş gelýän alamatlaryň biridir.
Barlaglarda ýetginjeklere gazlandyrylan içgiler, energetikler, şerbetler, süýjili çaýlar we kofeler, şeýle hem süýtli kokteýller berildi.
Netijeler süýji içgileri köp içmegiň gönüden-göni was-waslyga getirmese-de, ikisiniň arasynda durnukly baglanyşygyň bardygyny görkezdi.
«Häzirlikçe biz munuň gönümel sebäbi diýip, tassyklap bilmesek-de, bu barlag ýaşlarda süýji içgileri içmek bilen dowul alamatlarynyň arasyndaky zyýanly arabaglanyşygy ýüze çykardy. Soňky ýyllarda was-wasa düşüp ýören ýetginjekler has-da köpeldi, şonuň üçin munuň dowam etmeginiň öňüni almak üçin üýtgedip boljak durmuş endiklerini anyklamak örän möhümdir» diýip, Keýsi barlagyň maksadyny düşündirýär.
