21-nji fewralda Türkmenistanyň Daşary işler ministrliginde Türkmenistanyň Ministrler Kabinetiniň Başlygynyň orunbasary, Daşary işler ministri Raşid Meredowyň başlyklyk etmeginde ÝUNESKO-nyň işleri baradaky Türkmenistanyň Milli toparynyň nobatdaky mejlisi geçirildi.
Mejlisiň işine Ministrler Kabinetiniň Başlygynyň degişli orunbasarlary, ugurdaş ministrlikleriň we pudaklaýyn dolandyryş edaralarynyň ýolbaşçylary, ÝUNESKO-nyň işleri baradaky Türkmenistanyň Milli toparynyň jogapkär kätibi, şeýle hem ylmy edaralaryň we jemgyýetçilik guramalarynyň wekilleri gatnaşdylar.
Tassyklanan gün tertibine laýyklykda, gatnaşyjylar Milli toparyň 2025-nji ýylda ýerine ýetiren işleriniň netijelerine, medeniýet we ylym ulgamlary boýunça hasabatlara seretdiler, şeýle hem 2026-njy ýyl üçin Iş meýilnamasyny ara alyp maslahatlaşdylar.
Şeýle-de mejlisiň barşynda ÝUNESKO-nyň Adamzadyň maddy däl medeni mirasynyň wekilçilikli sanawyna girizilen medeni gymmatlyklar, milli mirasy «Dünýäniň hakydasy» maksatnamasynyň çäklerinde hödürlemek, Aşgabat şäheriniň ÝUNESKO-nyň «Öwreniji şäherleriniň bütindünýä toruna» girizilmegi, UNITWIN maksatnamasynyň çäklerinde Türkmenistanyň Ylymlar akademiýasynyň Tehnologiýalar merkeziniň ýanynda «Sanly ylym» kafedrasynyň döredilmegi, şeýle hem HYYÖ-uniwersitetinde ÝUNESKO klubunyň açylmagy bellenildi. Mejlisiň çäklerinde ýurdumyzyň kandidaturasyny 2026-2030-njy ýyllar üçin Maddy däl medeni mirasy gorap saklamak boýunça hökümetara komitetine hödürlemek meselesine hem seredildi.
Mejlisiň ahyrynda gatnaşyjylar bilimi, ylmy, medeniýeti, durnukly ösüşi we halkara ynsanperwer hyzmatdaşlygy ösdürmek maksady bilen, Türkmenistanyň ÝUNESKO bilen netijeli hyzmatdaşlygyny mundan beýläk-de berkitmäge ygrarlydyklaryny tassykladylar.
