Prezident Serdar Berdimuhamedow 2026–2027-nji okuw ýylynda türkmen ýaşlaryny Rumyniýanyň ýokary okuw mekdeplerine okuwa ibermek baradaky teklibi makullady diýip, «Watan» habarlar gepleşigi habar berýär. Bu baradaky maglumat sanly ulgam arkaly geçirilen Ministrler Kabinetiniň nobatdaky mejlisinde mälim edildi.
Bu mesele boýunça wise-premýer B. Mämmedow hasabat berdi. Ol dostlukly ýurduň ýokary okuw mekdeplerinde aşakdaky ugurlar boýunça hünärmenleri taýýarlamagyň maksadalaýykdygyny belledi:
- maglumat tehnologiýalary;
- saglygy goraýyş we lukmançylyk ylymlary;
- bilim we pedagogika ylymlary;
- oba hojalygy we oba hojalyk ylymlary;
- inženerçilik işi;
- tehnologiýalar we tehniki ylymlar;
- matematika we tebigy ylymlar.
Döwlet Baştutany hasabaty diňläp, ýurtda ýaşlaryň daşary ýurtlaryň abraýly ýokary okuw mekdeplerinde bilim almagy üçin giň mümkinçilikleriň döredilýändigini we munuň milli ykdysadyýetiň pudaklaryny ýokary derejeli hünärmenler bilen üpjün etmäge ýardam etjekdigini nygtady. Serdar Berdimuhamedow wise-premýere bu teklibi durmuşa geçirmek boýunça degişli işleri amala aşyrmagy tabşyrdy.
