Awstraliýada Sidneýiň günbatarynda, ýaňy-ýakynda açylan «Western Sydney» halkara uçar menziliniň golaýynda gurulmagy meýilleşdirilýän täze Bredfild şäheriniň esasy meýilnamasy tanyşdyryldy. Bu taslama ýurtda soňky 100 ýyldan gowrak wagtyň dowamynda döredilen ilkinji iri şäher aglomerasiýasy bolar.
Umumy meýdany 114 gektary öz içine alýan taslama, Amerikanyň «SOM» binagärlik studiýasy tarapyndan Awstraliýanyň «Hassell» býurosy bilen bilelikde işlenip düzüldi.
Bredfild şäheri Sidneýiň täze şäher özeni hökmünde kesgitlenildi we ol megapolisiň işewürlik merkezinden takmynan 50 kilometr uzaklykda ýerleşer. Meýilnama laýyklykda, şäherde 10 müňe golaý ýaşaýyş jaýy, uniwersitet şäherçesi, dört sany jemgyýetçilik merkezi we giň göwrümli ýaşyl zolaklar ulgamy bina ediler. Bu ýaşyl zolaklaryň arasynda uzynlygy 2,2 kilometr bolan «Green Loop» seýilgähi we 2 gektar meýdany eýeleýän Merkezi seýilgäh aýratyn orun alar.
Taslama dolulygyna ekologik durnuklylyga we klimatyň üýtgemegine uýgunlaşmaga gönükdirilendir. Şeýle-de, şäheriň konsepsiýasy taýýarlanylanda Awstraliýanyň ýerli halklarynyň medeniýeti we durmuş ýörelgeleri hem düýpli nazarda tutuldy.
Gurluşygyň ilkinji tapgyry 5,7 gektar meýdany öz içine alyp, bu çäkde 1400 sany öý, ofis we söwda binalary, myhmanhana hem-de açyk jemgyýetçilik meýdançalary ýerleşdiriler.
