Pokémon ýapon franşizasynyň iň seýrek kolleksiýa kartlarynyň biri ABŞ-da geçirilen auksionda 16,5 million dollara satyldy. The Japan Times gazetiniň habar bermegine görä, bu gymmatbahaly eksponaty Ak Tamyň öňki metbugat sekretary Entoni Skaramuççiniň ogly satyn aldy.
Bu baha diňe bir Pokémon taryhynda däl, eýsem tutuş kolleksiýa kartlarynyň bazarynda absolýut rekord boldy. Goldin auksion öýüniň maglumatlaryna görä, ýüzünde Pikaçunyň şekili bolan bu kart ozal hem rekord goýupdy. 2021-nji ýylda meşhur bloger Logan Pol ony 5,3 million dollara satyn alypdy. 2026-njy ýylda bolsa kartyň täze bahasy üç esse diýen ýaly ýokarlandy.
Bu kart adaty kagyzdan däl, eýsem hakyky zergärçilik sungat eseri hökmünde ýasalypdyr. Ol arassa altyndan ýasalan kulon görnüşinde edilipdir.
Jemi 35 karatlyk 10 000-e golaý göwher bilen bezelen. Kulonyň birigýän ýeri bolsa goşmaça 6,5 karatlyk göwherler bilen örtülen we altyn zynjyra berkidilen.
Bu kart 1998-nji ýylda diňe 41 nusgada çykarylypdy. Deňeşdirmek üçin, 2025-nji ýyla çenli dünýäde 75 milliarddan gowrak adaty Pokémon kartlary çap edildi.
Rekord goýan bu kart Professional Sports Authenticator (PSA) tarapyndan iň ýokary baha (Grade 10) alan dünýädäki ýeke-täk nusgadyr.
1996-njy ýylda Nintendo tarapyndan döredilen Pokémon franşizasy häzirki wagtda dünýä medeniýetiniň aýrylmaz bölegidir. Eş we Pikaçunyň başdan geçirmeleri baradaky teleserial dünýäniň 192 ýurdunda görkezilip, birnäçe nesliň söýgüli gahrymanyna öwrüldi.
