NASA üçünji «ganatly» uçary synagdan geçirdi: ol ýangyç sarp edilişini peseldýär

NASA aerodinamiki garşylygy gowşatmak we ýangyjy az sarp etmek maksady bilen ýasalan CATNLF ganatynyň uly göwrümli modeliniň ilkinji uçuş synagyny geçirdi. Synag 29-njy ýanwarda Kaliforniýadaky NASA-nyň Armstrong adyndaky barlag merkezinde amala aşyrylsa-da, bu barada resmi taýdan diňe häzir habar berildi.
Uçarman barlaghanasy hökmünde F-15 kysymly söweşiji uçaryň esasynda döredilen F-15B barlag uçary ulanyldy. Synag döwründe uçaryň korpusynyň aşagynda CATNLF ganatynyň kiçeldilen modeli dikligine, ýagny uçaryň guýruk kili görnüşinde berkidildi. Takmynan 75 minut dowam eden uçuşda esasy wezipe goşmaça gurnama goýlan uçaryň hereketdäki howpsuzlyk meselesini barlamakdan ybarat boldy.
CATNLF tehnologiýasy çeňňek şekilli ganatlarda howanyň laminar akymyny saklamaga gönükdirilendir. Adaty şertlerde şeýle akym çaltlyk bilen turbulent akymyna öwrülýär, bu bolsa garşylygy we ýangyç sarp edilişini artdyrýar. Laminar we turbulent akymlaryň ganatyň ýüzüniň gyzyşyna dürliçe täsir edýändigi sebäpli maglumatlary toplamak üçin infragyzyl kamera ulanyldy,
«Ilkinji uçuş esasan uçuş diapazonyny giňeltmäge gönükdirildi. Biz barlag manýowrlaryna geçmezden ozal, modeliň dinamikadaky hereketleriniň howpsuzdygyna göz ýetirmelidik» diýip, taslamanyň ýolbaşçy barlagçysy Mişel Bançi düşündirdi.
NASA bu tehnologiýanyň täjirçilik uçarlarynda ulanmak mümkinçiliklerini öwrenmek üçin jemi 15-e çenli synag uçuşyny geçirmegi meýilleşdirýär.