Alymlar dünýäde iň kiçi QR-koduny döretdiler. Ol eýýäm Ginnesiň rekordlar kitabyna girizildi.
Koduň ölçegi öňki hasaba alnan rekordyň üçden bir bölegi ýaly, şonuň üçin ony adaty göz bilen görjek gümanyň ýok.
«Biziň döreden gurluşymyz şeýle bir inçe welin, ony optiki mikroskoplaryň kömegi bilenem görüp bolmaýar» diýip, professor Pol Maýrhofer düşündirdi. Onuň aýtmagyna görä, kod kiçijikligine garamazdan, durnukly bolmagynda galýar, hatda aýry-aýry atomlar bilen işlenilende-de köp gezek okalyp bilinýär. Hut şunuň özi hem maglumatlaryň onlarça ýyllap saklanmagy üçin ýeterlikdir.
QR-kody döretmek üçin gyzgynlyga we basyşa durnukly inçe keramika gatlaklary ulanylýar. Kod fokuslanan ion şöhleleri arkaly çekilýär, her bir piksel bolsa takmynan 49 nanometre deňdir. Bu yşygyň tolkun uzynlygyndan 10 esse kiçi diýmekdir.
Täze tehnologiýa keramiki gatlagy bolan A4 formatly ýekeje kagyzda iki terabaýtdan gowrak maglumaty ýerleşdirmäge mümkinçilik berýär. Adaty maglumat saklaýjylardan tapawutlylykda, munuň üçin elektrik energiýasy ýa-da sowadyş ulgamy talap edilmeýär.
«Biz maglumatlar eýýamynda ýaşasak-da, maglumatlaryň köpüsi gysga ömürli enjamlarda saklanýar» diýip, Aleksandr Kirnbauer düşündirýär. Ol keramika göterijileriniň uzak ömürliliginiň olary ekologiýa taýdan amatly alternatiwa öwürýändigini we bu tehnologiýanyň durnukly sanly geljege tarap ädim bolup biljekdigini nygtaýar.
Häzirki wagtda hünärmenler maglumatlary uzak möhletleýin saklamak üçin önümçiligi tizleşdirmegiň hem-de arzanlaşdyrmagyň, maglumatlary uzak möhletleýin saklamak üçin has çylşyrymly gurluşlary döretmegiň üstünde işleýär.
