Claude emeli aň modelini işläp düzen Anthropic kompaniýasy EA tehnologiýalarynyň ösüşini haýallatmak ýa-da wagtlaýynça togtatmaga çagyrýan makalany çap etdi. Bu ylmy makalanyň awtordaşy kompaniýanyň esaslandyryjylarynyň biri Jek Klarkdyr.
Makalada häzirki zaman emeli aň ulgamlarynyň adamyň gönümel gatnaşmagy bolmazdan, öz ukyplaryny özbaşdak gowulandyrmak tapgyryna golaýlaşandygy bellenilýär. Awtorlar munuň geljekde nähili netijelere getirjekdiginiň heniz bütinleý nämälimdigini aýratyn nygtaýarlar.
Anthropic-iň wekilleriniň pikirine görä, pudagyň öňdebaryjylary jemgyýetiň we döwlet edaralarynyň döräp biläýjek üýtgeşmelere öwrenişmäge wagt tapmagy üçin täze modelleri taýýarlamagyň depginini peseltmelidirler. Şol bir wagtyň özünde, kompaniýa munuň ýaly çemeleşmäni durmuşa geçirmegiň täze emeli aň nusgalarynyň gizlinlikde işlenip düzülmeginiň we kämilleşdirilmeginiň öňüni alyp biljek global gözegçilik ulgamyny döretmegi talap etjekdigini-de boýun alýar.
Munuň üçin awtorlar beýleki çylşyrymly tehnologiýalary, mysal üçin, ýakyn we orta aralyga atylýan raketalary ýok etmek baradaky halkara şertnamasy ýaly gözegçilik gurluşlaryny deňeşdirme getirýärler. Şunuň bilen bir wagtda, olar beýle düzgünleriň döredilmegi üçin onlarça ýylyň sarp edilendigini ýatlap: «Biziň onça köp wagtymyz ýok» diýmek bilen, ätiýaç edilýän ýagdaýyň derwaýys hem çözülmesi mähetdel meseledigini ýaňzydýarlar.
Anthropic kompaniýasy bäş ýyl mundan ozal, Dario Amodeiniň ýolbaşçylygynda OpenAI kompaniýasynyň öňki işgärleriniň topary tarapyndan esaslandyryldy. Şu ýyl kompaniýa programlaşdyrmak üçin niýetlenen «Claude Code» gurallarynyň kömegi bilen ägirt uly üstünlikler gazandy.
Anthropic kompaniýasynyň bazardaky umumy bahasy özüniň esasy bäsdeşi bolan OpenAI kompaniýasyndan hem geçip, 965 milliard dollara ýetdi. Kompaniýa 1-nji iýunda gysga wagtyň içinde aksiýalaryny halk köpçüligine hödürläp, birža çykmak meýilnamalaryny resmi taýdan mälim etdi.
