WWDC 2026 maslahatynyň çäklerinde Apple kompaniýasy iOS 27 operasion ulgamyny resmi taýdan görkezdi. Bu ulgamyň iň esasy täzelikleriniň biri emeli aňyň esasyndaky Siri-niň täze görnüşi boldy, ýöne täzelenme öndürijilige, dizaýna we beýleki funksiýalara hem üýtgeşmeleri getirdi.
Apple Intelligence emeli aň funksiýalarynyň diňe iPhone 15 Pro we ondan soňky modellerde elýeterli boljakdygyny bellemek gerek. Has öňki enjamlaryň eýeleri hem öz telefonlaryna iOS 27 ulgamyny gurnap biler, ýöne emeli aň mümkinçilikleriniň köpüsinden peýdalanyp bilmez.
«Foto» goşundysyndaky üýtgeşmeler
Ulgama suratlary gaýtadan işlemek üçin generatiw emeli aň gurallary goşuldy. Ulanyjylar emeli aňyň kömegi bilen suratlardaky artykmaç zatlary aňsatlyk bilen aýryp, suratyň fonuny kadryň çäginden daşary giňeldip we surata düşürilen burçy üýtgedip biler.
Öndürijilik we durnuklylyk
Apple kompaniýasy ulgamyň çalt işlemegine aýratyn üns berdi. Resmi tanyşdyrylyşdan mälim bolşuna görä, indi:
- programmalar 30% has çalt açylýar;
- AirDrop arkaly faýllary ibermegiň tizligi 80% ýokarlandy;
- öňki iPhone modelleriniň işjeňligi we duýgurlygy gowulandyryldy;
- «Spotlight» we ulgamyň gözleg funksiýasy gaýtadan işlendi.
Dizaýn üýtgeşmeleri
Liquid Glass interfeýsinde durulyk sazlaýjysy peýda boldy. Ulanyjylar dizaýn elementleriniň durulyk derejesini özlerine görä sazlap biler. Şeýle hem, goşundy nyşanjyklarynyň görnüşi üýtgedildi we interfeýsiň kontrastlygy has kämilleşdirildi.
Beýleki täzelikler:
- iCloud-yň umumy albomlary indi Android we Windows ulgamlary bilen hem işleýär;
- FaceTime wideoaragatnaşygyna bir wagtyň özünde iki kameradan hem düşürmek mümkinçiligi goşuldy;
- «Habarlarda» (Messages) surat çekmek üçin aýratyn programma goşuldy;
- Telefon kese öwrülende «Live Activities» funksiýasynyň işjeňligi goldanylýar;
- Esasy ekranda ulaldylan wijetler peýda boldy;
- Budilnigiň ses derejesini aýratyn sazlamak mümkinçiligi döredildi;
- AirPods üçin ýöriteleşdirilen ekwalaýzer goşuldy;
- Bir telefon belgisini bir wagtyň özünde iki iPhone-da ulanmak mümkinçiligi bar.
Apple-iň berýän maglumatyna görä, iOS 27 ulgamynda jemi 200-den gowrak dürli gowulaşdyrmalar amala aşyryldy.
Goldanylýan enjamlar
iOS 27 operasion ulgamy ozal iOS 26 ulgamyny goldan ähli modellerde elýeterli bolar:
- iPhone 11, 11 Pro, 11 Pro Max
- iPhone 12, 12 mini, 12 Pro, 12 Pro Max
- iPhone 13, 13 mini, 13 Pro, 13 Pro Max
- iPhone 14, 14 Plus, 14 Pro, 14 Pro Max
- iPhone 15, 15 Plus, 15 Pro, 15 Pro Max
- iPhone 16, 16 Plus, 16e, 16 Pro, 16 Pro Max
- iPhone 17, 17e, 17 Pro, 17 Pro Max
- iPhone SE (ikinji we üçünji nesilleri).
Geljekki iPhone 18 modelleri bolsa bu ulgam bilen üpjün edilen görnüşde satuwa çykarylar.
Çykjak möhletleri
Işläp düzüjiler üçin niýetlenen beta-görnüşi WWDC 2026 maslahatyndan soň elýeterli boldy. Köpçülikleýin synaglar bolsa iýul aýynda başlar. Ähli ulanyjylar üçin iOS 27 ulgamynyň gutarnykly relizi 2026-njy ýylyň sentýabr aýyna meýilleşdirildi.
