Google DeepMind ylmy we inženerçilik meselelerini çözmäge gönükdirilen Gemini 3 Deep Think modeliniň uly täzelenmesini tanyşdyrdy. Modeliň iň esasy görkezijisi — ARC-AGI-2 testinde 84,6% netije görkezmegidir. Bu test emeli aňyň ozal görmedik täze abstrakt meselelerini öwrenilen maglumatlara esaslanman, diňe logika arkaly çözmek ukybyny barlaýar.
Bu görkeziji emeli aňyň ösüş taryhynda düýpli öňegidişlikdir. Umumylykda, emeli aňlaryň netijeleri şular ýaly: Gemini 3 Deep Think: 84,6%; Adamyň ortaça netijesi: 60%; Claude Opus 4.6: 68,8%; GPT-5.2 Thinking: 52,9%.
Ýatladyp geçsek, dekabr aýyndaky öňki wersiýa bary-ýogy 45,1% netije görkezipdi. Bary-ýogy birnäçe aýyň içinde şeýle ösüş emeli aňyň "pikir ediş" ukybynyň nähili çalt ösýändigini subut edýär.
Täze model diňe bir testlerde däl, eýsem amaly ylymlarda hem ýokary netijeleri gazandy:
- Halkara Olimpiadalar: 2025-nji ýylyň fizika we himiýa boýunça halkara olimpiadalarynyň ýazmaça tapgyrlarynda "altyn medal" derejesine ýetdi.
- Programmirleme: Codeforces platformasynda 3455 Elo reýtingini aldy (bu Gemini 3 Pro we beýleki bäsdeşlerinden ep-esli ýokarydyr).
- Akademiki synag: "Humanity’s Last Exam" (Adamzadyň iň soňky synagy) atly çylşyrymly akademiki testde hiç hili goşmaça gural ulanmazdan 48,4% bal toplady.
Google bu modeliň diňe bir sanlar däl, eýsem hakyky işlerde-de uly kömek berýändigini belleýär. Ol ylmy makalalary barlamakda we uniwersitet barlaghanalarynda ýarym geçiriji materiallaryň sintezini optimallaşdyrmakda ulanylýar.
Deep Think häzirki wagtda Google AI Ultra abonentleri üçin elýeterli edildi we ilkinji gezek Gemini API arkaly irki elýeterlilik (early access) tapgyrynda açyldy. ARC Prize bäsleşiginiň döredijileri bu netijäniň AGI (Ähliumumy emeli aň) ýolundaky uly ädimdigini, ýöne eýýäm has çylşyrymly ARC-AGI-3 testiniň taýýarlanýandygyny habar berdiler.
