X (öňki Twitter) sosial ulgamynda «cprkrn» lakamly ulanyjy Anthropic kompaniýasynyň Claude emeli aň modeliniň kömegi bilen içinde 5 sany bitkoini bolan kripto gapjygyna girmegi başardy. Bu gapjyk mundan 10-11 ýyl ozal gulplanypdy.
Onuň aýtmagyna görä, ol 2015-nji ýyldan bäri 5 sany bitkoini (şol wagt bir bitkoin takmynan 240 dollar töweregidi) satyn alypdyr, ýöne soňra onuň açarsözüni ýitipdir.
Ol açarsözi tapmak üçin tas iki aýlap ýörite kärendesine alnan güýçli wideo-kartalary (GPU) ulanýar, «btcrecover» we «Hashcat» ýaly programmalaryň kömegi bilen 3,5 trilliona golaý meňseş açarsözleri barlap görýär, emma hiç hili netije çykmaýar.
Ähli synaglary şowsuz bolandan soň, ulanyjy özüniň talyplyk ýyllaryndan galan noutbugyndaky köne faýllary we maglumatlary Claude emeli aňyna ýükläp, seljermegi soraýar.
Emeli aň gaty gysga wagtyň içinde şol faýllaryň arasyndan kripto gapjygyň 2019-njy ýylda döredilen ätiýaçlyk nusgasyny (backup) tapyp berýär. Iň esasy zat bolsa, bu ätiýaçlyk nusgasy gapjygyň eýesiniň örän gowy ýadynda bolan köne we adaty açarsözi bilen şifirlenipdir.
Habar internetde ýaýran badyna köp adamlar «Emeli aň bitkoinli gapjygy döwüp açandyr» diýip pikir etdiler. Emma gapjygyň eýesi «Emeli aň hiç hili kod ýa-da şifr döwmedi. Ol diňe köne faýllaryň arasynda gözden sypyp, gizlenip galan maglumatlary seljerip, gerekli gapjygyň nusgasyny tapmaga kömek etdi» diýip, ýagdaýyň çaklanylyşy ýaly däldigini düşündirdi
CoinDesk neşiri hem bu wakanyň kriptografiýa hiç hili howp salmaýandygyny, gaýtam emeli aňyň köne maglumatlary gözlemekde peýdalydygyny subut edýändigini belledi. Sebäbi şeýle goragly gapjygy hakykatdan döwmek üçin ýa kämil kwant kompýuteri, ýa-da şifirleme algoritminiň özünde gaty uly kemçilik bolmaly.
Kripto gapjyk ýiten wagtyndan bäri bitkoiniň bahasy hem ägirt uly derejede gymmatlady. Häzirki wagtda 1 BTC-niň bahasy ýokary derejelere ýetdi we şol 5 bitkoin häzir tas 400 000 dollar töweregi bolup durýar. Bagty çüwen ulanyjy eýýäm 13-nji maýda ähli kriptowalýutasyny nagtlaşdyrmak üçin gapjykdan çykardy.
