OpenAI kompaniýasy ChatGPT platformasynda mahabatlary görkezmek boýunça synaglara başlady. Häzirki wagtda bu synag diňe ABŞ-daky hasaba alnan uly ýaşly ulanyjylara degişlidir. Synag hem mugt wersiýany, hem-de käbir tölegli nyrhnamalary öz içine alýar.
Kompaniýanyň bellemegine görä, Plus, Pro, Business, Enterprise we Education nyrhnamalaryny ulanýanlar üçin hyzmat mahabatsyz bolmagynda galar.
Mahabatlar açyk-aýdyň görnüşde bellenen "hemaýatkärlik bildirişleri" hökmünde hödürlener. Olar emeli aňyň berýän adaty jogaplaryndan wizual taýdan tapawutlandyrylar. Bu bolsa ulanyjylaryň mahabaty modeliniň berýän netijesi bilen garyşdyrmazlygy üçin edilýär.
OpenAI ChatGPT-niň jogaplarynyň mahabat berijilerden garaşsyzdygyny we olaryň mazmunyna hiç hili täsir edilmeýändigini nygtaýar.
Mahabatlar söhbetdeşligiň mowzugyna, öňki çatlara we mahabatlar bilen bolan gatnaşyklara görä saýlanar. Meselem, nahar bişirmek barada gürrüň gidende, azyk önümleri ýa-da nahar eltip bermek hyzmatlary baradaky bildirişler peýda bolup biler.
Mahabat berijiler ulanyjylaryň şahsy maglumatlaryna ýa-da söhbetdeşlikleriniň mazmunyna elýeterlilik alyp bilmezler. OpenAI olara diňe umumy statistikany berýär.
Mahabatlardan gelýän girdeji infrastruktura çykdajylaryny ýapmaga we emeli aň mümkinçiliklerini has giň auditoriýa ýetirmäge kömek eder. Şeýle-de, ABŞ-da aýda 8 dollar bolan täze "Go" nyrhnamasy hem elýeterli edildi. Mahabat görmek islemeýän ulanyjylar has gymmat nyrhnamalary saýlap bilerler ýa-da käbir çäklendirmeler bilen mahabaty öçürip bilerler.
