2026-njy ýylyň 11-nji fewralynda Rumyniýanyň Daşary işler ministrliginde Türkmenistanyň Rumyniýadaky ilçisi A. Annaýewiň Rumyniýanyň DIM-niň Döwlet sekretary Anna Tinka bilen duşuşygy geçirildi.
Söhbetdeşler türkmen-rumyn gatnaşyklarynyň häzirki ýagdaýyny we ösüş mümkinçiliklerini ara alyp maslahatlaşdy. Özara hormata we ynama esaslanýan ikitaraplaýyn hyzmatdaşlygyň yzygiderli ösýändigi, şeýle hem taraplaryň syýasy gepleşikleri mundan beýläk-de berkitmäge gyzyklanma bildirýändikleri bellenildi.
Ykdysadyýet we ulag ulgamlaryndaky özara hereketlere, parlamentara gatnaşyklara, şeýle hem konsullyk hyzmatdaşlygy meselelerine aýratyn üns berildi. Taraplar bar bolan gepleşik mehanizmlerini netijeli ulanmagyň ähmiýetini nygtady we olaryň işini işjeňleşdirmäge taýýardyklaryny tassyklady.
Duşuşygyň dowamynda köptaraplaýyn hyzmatdaşlyk meselelerine we Türkmenistanyň parahatçylygy, howpsuzlygy hem-de durnukly ösüşi berkitmäge gönükdirilen halkara başlangyçlaryna hem garaldy.
Gepleşikleriň netijeleri boýunça hyzmatdaşlygy mundan beýläk-de giňeltmäge we netijeli gepleşikleri dowam etdirmäge özara taýýarlyk tassyklanyldy.
Buharestde Türkmenistanyň ilçisiniň Rumyniýanyň DIM-niň Döwlet sekretary bilen duşuşygy boldy
- şu gün 18:53
- 385
