Gurbanguly Berdimuhamedow Azerbaýjanyň we Ermenistanyň ýolbaşçylaryny halkara baýragy bilen gutlady

Türkmenistanyň Halk Maslahatynyň Başlygy Gurbanguly Berdimuhamedow sanly ulgam arkaly Azerbaýjan Respublikasynyň Prezidenti Ilham Aliýewe we Ermenistan Respublikasynyň Premýer-ministri Nikol Paşinýana adamzadyň doganlygy ugrunda halkara Zaýed baýragynyň gowşurylmagy mynasybetli gutlagyny ýollady. Gutlagyň tekstini TDH agentligi çap etdi. 
Halk Maslahatynyň Başlygy Türkmenistanyň bu iki ýurt bilen köpasyrlyk taryhy, syýasy, ykdysady we medeni-ynsanperwer gatnaşyklaryna aýratyn ähmiýet berýändigini nygtady.
«Azerbaýjanyň Prezidentiniň we Ermenistanyň Premýer-ministriniň paýhasynyň, ýokary jogapkärçiliginiň iki ýurduň rowaçlygyny, abadançylygyny üpjün etmäge, Günorta Kawkazda uzak möhletli durnuklylygy hem-de ylalaşygy saklamaga we berkitmäge uly täsir edýän wajyp şert bolup çykyş edýändigini nygtamak isleýärin. Şeýh Zaýed adyndaky baýragyň berilmeginiň dünýä derejesinde hoşniýetli goňşuçylyk däpleriniň, parahatçylyk filosofiýasynyň, ynanyşmagyň we özara hormata esaslanýan dialogyň ýokary gymmatlyklaryny yzygiderli gorap saklamak üçin ruhlandyryjy itergi boljakdygyna ynanýarys» diýlip, gutlagda bellenilýär.
Türkmen halkynyň Milli Lideri Azerbaýjan bilen Ermenistanyň arasynda parahatçylygy we ylalaşygy gazanmak boýunça möhüm çözgütleriň hut Halkara parahatçylyk we ynanyşmak ýylynda (2025) kabul edilmeginiň taryhy ähmiýetini aýratyn belledi.
Şeýle hem Türkmenistanyň hemişelik Bitaraplyk derejesinden ugur alyp, sebitleýin parahatçylygy döretmek we halkara hukugyň kadalaryny goramak ugrundaky tagallalary hemmetaraplaýyn goldamaga taýýardygy tassyklanyldy.
Gutlag sözüniň ahyrynda Gurbanguly Berdimuhamedow bu halkara baýragynyň taraplaryň arasyndaky ykdysady we infrastruktura taslamalaryna täze itergi berjegendigine ynam bildirip, iki goňşy ýurduň halklaryna parahatçylyk we rowaçlyk arzuw etdi.