Türkmenistanyň Ministrler Kabinetinde ýanwar aýynda durmuş-ykdysady ösüşiň jemleri jemlendi

Prezident Serdar Berdimuhamedow anna güni sanly ulgam arkaly Türkmenistanyň Ministrler Kabinetiniň nobatdaky mejlisini geçirdi. Onda 2026-njy ýylyň ýanwar aýynda alnyp barlan işleriň jemleri jemlendi. Bu barada «Watan» habarlar gepleşiginde habar berildi.
Hödürlenen hasabatlara görä, hasabat döwründe jemi içerki önümiň ösüşi 6,3 göterim boldy. Senagat, gurluşyk, ulag we aragatnaşyk, söwda, oba hojalygy we hyzmatlar ulgamynda oňyn görkezijiler hasaba alyndy. Öndürilen önümleriň möçberi geçen ýylyň ýanwar aýy bilen deňeşdirilende 10 göterim artdy. Bölek satuw haryt dolanyşygy bolsa 10,1 göterim ýokarlandy.
Döwlet býujetiniň girdeji böleginiň meýilnamasy 102,2 göterim, çykdajy bölegi bolsa 97,1 göterim ýerine ýetirildi. Zähmet haklary, pensiýalar, döwlet kömek pullary we talyp haklary öz wagtynda maliýeleşdirildi. Özleşdirilen düýpli maýa goýumlaryň möçberi 21,3 göterim ýokarlandy.
Nebitgaz pudagynda nebiti we gazy çykarmak, nebiti gaýtadan işlemek, benzin, dizel ýangyjyny we suwuklandyrylan gazy öndürmek boýunça meýilnamalar artygy bilen ýerine ýetirildi. Oba hojalygynda önümçiligiň ösüşi, möwsümleýin meýdan işleriniň we ekiş möwsümine taýýarlyk çäreleriniň dowam edýändigi bellenildi.
Gurluşyk we senagat ulgamynda önüm öndürmek we işleri ýerine ýetirmek boýunça meýilnamalar artygy bilen berjaý edildi. Söwda, dokma senagaty we telekeçilik ulgamlarynda hem oňyn netijeler gazanyldy. Ýanwar aýynda 26 birža söwdasy geçirilip, olarda 2 361 şertnama hasaba alyndy.
Medeniýet, bilim, saglygy goraýyş, ylym we sport ulgamlaryna aýratyn üns berildi. Ýurtda bilim ulgamynda özgertmeler dowam edýär, mekdep okuwçylary we talyplar halkara olimpiadalarynda 62 medal gazandy. «Saglyk» döwlet maksatnamasyna laýyklykda işler hem alnyp barylýar.
Daşary syýasat gurşawynda ýanwar aýynda saparlar we gepleşikler, halkara duşuşyklary we maslahatlaşmalar geçirildi, şertnamalaýyn-hukuk binýady giňeldildi.
Döwlet Baştutany mejlisi jemläp, ykdysadyýetiň durnukly ösüşini belledi we pudaklary ösdürmek hem-de öňde goýlan wezipeleri durmuşa geçirmek boýunça işleri dowam etdirmegi tabşyrdy.