Amerikaly telekeçi Ilon Mask özüniň SpaceX kosmos kompaniýasynyň we emeli aň ulgamyndaky xAI startap kompaniýasynyň birleşýändigini yglan etdi, diýlip SpaceX saýtynda habar berilýär.
Işewüriň aýtmagyna görä, iki kompaniýanyň birleşmegi bir wagtda emeli aň, raketagurluşyk, internet hyzmatlaryny hödürlemek we sosial media bilen meşgullanyp biljek «innowasion maşynyň» peýda bolmagyna getirer.
Kuwwatlyklaryň kosmosa geçirilmegi emeli aň ulgamlary üçin elektrik energiýasynyň ýetmezçiligi meselesini çözmäge mümkinçilik berer.
Geleşigiň maliýe şertleri resmi taýdan aýdylmaýar, emma ýagdaýdan habarly çeşmeler xAI-a 125 milliard dollar, SpaceX-e bolsa 1 trillion dollar baha berýärler. Mundan ozal Tesla kompaniýasy hem öz zawodlaryny awtomatlaşdyrmak üçin xAI-a 2 milliard dollar maýa goýupdy.
Mask xAI-yň mümkinçiliklerini Optimus awtonom robotlaryny dolandyrmak üçin ulanmagy meýilleşdirýär, olaryň önümçiligini S we X elektromobil modellerini çykarýan kuwwatlyklaryň binýadynda ýola goýmak göz öňünde tutulýar.
Bilermenler aktiwleriň birleşdirilmegini SpaceX-iň gazna bazaryna çykmak ähtimallygy bilen baglanyşdyrýarlar.
«Bu kompaniýalaryň IPO-nyň öňüsyrasynda birleşdirilmegi SpaceX-e köpçülikleýin maýadarlara differensiýasiýa perspektiwasyny we maýa nukdaýnazaryndan netijeli ösüşi görkezmäge mümkinçilik berýär» — diýip, Pitchbook kompaniýasynyň analitigi Emili Çžen belleýär.
