BSGG mekdep iýmiti boýunça maslahatlary hödürledi

Bütindünýä saglygy goraýyş guramasy (BSGG) okuw edaralarynda sagdyn we kadaly iýmitlenişi üpjün etmek boýunça ilkinji gezek ählumumy maslahatlary hödürledi. Gollanma bolup hyzmat edýän täze ýörelgeler çagalarda peýdaly iýmitleniş endiklerini kemala getirmäge we keselleriň öňüni almaga gönükdirilendir.
Berlen maglumatlara görä, 2025-nji ýylda dünýäde çagalaryň semizlik derejesi ilkinji gezek agram ýetmezçiligi görkezijilerinden ýokary boldy. Geçen ýyl her onunjy mekdep okuwçysynyň semizlikden ejir çekýändigini, 391 mln ýetginjegiň bolsa artykmaç agramynyň bardygyny görkezdi. 2025-nji ýylyň oktýabr aýyna çenli ýagdaýa görä, 104 döwlet sagdyn iýmitleniş syýasatyny girizdi, ýöne diňe 48 ýurt düzüminde duzy, şekeri we zyýanly ýaglary aşa köp saklaýan önümleriň marketingini çäklendirdi.
«Çagalaryň mekdepde iýýän naharlary we olaryň iýmitleniş medeniýetini kemala getirýän gurşaw okuwyň hiline ep-esli täsir edip biler, şeýle hem saglyga we umumy abadançylyga uzak möhletleýin täsirini ýetirer» – diýip, BSGG-niň baş direktory Tedros Adhanom Gebreýesus belledi.
BSGG iýmit rasionyny gowulandyrmak üçin çagalara sagdyn iýmitleriň we içgileriň elýeterliligini ýokarlandyrmagy, şol bir wagtda zyýanly önümleriň mukdaryny azaltmagy maslahat berýär. Bu bolsa iýmitdäki şekeriň, trans-ýaglaryň we duzuň mukdarynyň azaldylmagyny, däneli ekinleriň, miweleriň, hozlaryň we kösüklileriň paýynyň bolsa artdyrylmagyny aňladýar.
Täze iýmit maslahatlaryny durmuşa geçirmek üçin BSGG ýurtlara tehniki kömek berer, tejribe alşar we hyzmatdaşlygyň beýleki görnüşlerini ösdürer.