Söwda päsgelçilikleriniň bardygyna garamazdan, Hytaý geçen ýyly polat eksportynyň taryhy rekordy bilen tamamlady. Bloomberg agentliginiň habar bermegine görä, diňe dekabr aýynda Hytaý daşary ýurtlara 11,3 million tonna polat iberip, 2015-nji ýyldaky iň ýokary görkezijisinden hem öňe geçdi.
Esasy ykdysady görkezijiler:
- Ýyllyk eksport: 119 million tonna (ösüş 7,5%);
- Demir magdanynyň importy: 1,26 milliard tonna (ösüş 1,8%).
Dünýäde proteksionizm (içerki bazary goramak) we dempinge garşy salgytlaryň artmagyna garamazdan, hytaý kompaniýalary täze bazarlary, hususan-da, Ýakyn Gündogar ýurtlaryny işjeň özleşdirýärler. Şeýle-de, taýýar önümlere garanyňda has ýumşak gümrük düzgünlerine sezewar edilýän ýarym taýýar önümleriň eksporty ep-esli artdy.
Dekabr aýyndaky böküş, eksportçylaryň Hytaýda täze giriziljek ygtyýarnama (lisenzirleme) ulgamyndan öň ýetişmäge synanyşmaklary bilen düşündirilýär. "SDIC Futures" kompaniýasynyň bilermeni He Szýanhueýiň pikiriçe, täze çäklendirmeler eksporty togtadyp bilmez, sebäbi Hytaýyň içerki bazarynda bahalar pesligine galýar we daşary ýurtly sarp edijiler goşmaça çykdajylary öz üstüne almaga taýýar.
Emma şol bir wagtyň özünde, Hytaýyň portlarynda demir magdanynyň ätiýaçlyk gorlarynyň toplanmagy, zawodlaryň çig mala bolan hakyky isleginiň import möçberinden yza galyp başlandygyny görkezýär.
