Hytaýyň Jinggui International kompaniýasy Saud Arabystanyndaky Jeddah Tower diňiniň 120-nji gatdan ýokary böleginiň esasy polat gurluşyny gurmak boýunça şertnama aldy. Belentligi bir kilometrden geçjek geljekki gökdiräniň ähli esasy polat gurluşy hytaýly inženerler tarapyndan ýerine ýetiriler.
Jinggui International Çžeszýan welaýatyndan bolan «Jinggui Steel Structure Group» toparynyň ýanyndaky şahamçasydyr. Kompaniýa uly belentlikdäki desgalary taslamak, üpjün etmek, deslapky ýygnamak, daşamak we oturtmak işleri bilen meşgullanar.
Jeddah Tower Gyzyl deňziň kenaryndaky Jedda ykdysady zolagynda gurulýar we Saud Arabystanynyň «Vision 2030» maksatnamasynyň esasy taslamalarynyň biri hasaplanýar. Taslamanyň umumy bahasy 26 milliard dollardan geçýär.
157 gatly diňde «Four Seasons» myhmanhanasyny, kaşaň öýleri, A klasly ofisleri we dünýäniň iň belent syn ediş meýdançasyny ýerleşdirmek meýilleşdirilýär. Gurluşygy 2028-nji ýylda tamamlamak göz öňünde tutulýar.
2026-njy ýylyň maý aýynyň ahyryndaky ýagdaýa görä binanyň belentligi 400 metrden geçdi, gurluşyk bolsa 103-nji gata ýetdi. Işiň depginine görä, her üç-dört günde bir gat gurulýar. Täze şertnama gurluşyň durnuklylygyna we gurnama takyklygyna ýokary talaplaryň bildirilýän iň çylşyrymly bölegini öz içine alýar.
Taslamany durmuşa geçirmek üçin kompaniýa dört sany intellektual önümçilik hataryny işe girizdi. Gurluşykda S690 klasyndaky has berk polat ulanylýar, oturtmagyň takyklygy bolsa millimetr derejesinde saklanýar. Bu çöl şemalynyň, temperaturanyň düýpli üýtgemeleriniň we aşa ýokary belentligiň şertlerinde işlemek üçin zerurdyr.
