Kanada we Ýaponiýa «Kearney FDI Confidence Index 2026» maýadarlaryň ynam reýtinginde öz ornuny berkitdi, Hytaý bolsa on ýylyň içinde ikinji orundan dördünji orna düşdi.
Bu gözleg ýakyn üç ýylda maýa goýmak üçin iň özüne çekiji ýurtlara baha beren 507 sany halkara kompaniýanyň ýolbaşçylarynyň pikirlerine esaslanýar. Şunlukda, Kanada ikinji orna, Ýaponiýa bolsa üçünji orna çykdy.
Şol bir wagtyň özünde Pars aýlagynyň ýurtlarynyň hem orunlary güýçlenýär. Saud Arabystany ilkinji gezek iň uly on sany maýa goýum ugrunyň hataryna girdi, BAE bolsa Germaniýa we Beýik Britaniýa bilen bir hatarda dünýä liderleriniň arasyndaky ornuny berkitdi.
Gözlegiň maglumatlaryna görä, Kanada syýasy durnuklylygy, baý resurs binasy we emeli intellekt infrastrukturasyna goýulýan maýa goýumlary netijesinde ýokary özüne çekijilik derejesini saklaýar. 2025-nji ýylyň birinji ýarymynda ýurtda göni daşary ýurt maýa goýumlarynyň 297 sany taslamasy yglan edildi. Emeli aň nfrastrukturasyny ösdürmek boýunça gymmaty 926 million dollar bolan döwlet maksatnamasy bolsa muňa goşmaça itergi berdi.
Hytaýyň orunlary bolsa, tersine, geosyýasy töwekgelçilikleriň we söwda dartgynlygynyň basysy astynda galdy.
Saud Arabystany 2030-njy ýyla çenli her ýyl 100 milliard dollara çenli göni daşary ýurt maýa goýumlaryny çekmegi meýilleşdirýär. Häzirki wagtda ýurtda Amazon Web Services we Google Cloud kompaniýalarynyň gatnaşmagynda iri tehnologik taslamalar durmuşa geçirilýär. Meňzeş strategiýany Microsoft, Oracle we AWS kompaniýalarynyň öz ornuny giňeldýän ýeri bolan BAE hem alyp barýar.
