Gazagystanda sanly teňňe üçin kadalaşdyryjy-hukuk binýady tassyklanylyp, ol nagt we nagt däl pullar bilen bir hatarda, milli puluň üçünji görnüşi hökmünde resmi taýdan ykrar edildi. Bu barada döwlet maliýesini sanlylaşdyrmaga bagyşlanan brifingde maliýe ministriniň orunbasary Aset Turysow mälim etdi.
Onuň sözlerine görä, geçen ýyl Milli bank bilen bilelikde sanly teňňäni ulanmak arkaly 20 töweregi synag taslamasy durmuşa geçirildi. Alnan netijeler hökümete we Milli banka puluň täze görnüşini mundan beýläk-de ornaşdyrmak meýilnamasyny tassyklamaga mümkinçilik berdi.
Şu gün ýurt üçin möhüm taslama bolan sanly teňňe barada döwlet Baştutany hem belläp geçdi. Kadalaşdyryjy-hukuk üpjünçiligi tassyklanyldy. Resmi taýdan sanly teňňe Gazagystanda üçünji milli pul hasaplanýar diýip, Tengrinews neşiri Turysowyň sözlerini getirýär.
Sanly teňňäniň ulanylyşy tapgyrlaýyn giňeldiler. Ilkinji nobatda, ony býujet maksatnamalarynyň guramaçylary tarapyndan hödürlenen taslamalarda, şeýle hem hökümet tarapyndan kesgitlenen başlangyçlarda ulanmak meýilleşdirilýär.
2025-nji ýylyň iýul aýynda premýer-ministr Olžas Bektenow respublikan býujetden we Milli gaznadan maliýeleşdirilýän azyndan 100 sany iri taslamany sanly teňňä geçirmegi tabşyrypdy. Munuň býujet serişdeleriniň hereketiniň aýdyňlygyny ýokarlandyrmaga we olaryň ulanylyşyna gözegçiligi güýçlendirmäge kömek etjekdigi göz öňünde tutulýar.
