Beýni diňe duýgy organlaryndan duýduryşlary kabul etmeýär, ol olary mazaly işläp, üstüni ýetirýär we bolup geçýän zatlaryň aýdyň we oňaýly keşbini döredýär. Alymlaryň gelen bu netijesi «Nature Neuroscience» žurnalynda çap edildi.
Makalada beýniniň esasy görüş gatlagynyň (V1 meýdany) süzgüç hökmünde hereket edýändigi aýdylýar. Ol gözlerden maglumaty gönümel usulda geçirmeýär, gaýtam, ony geçmişdäki tejribä we dogabitdi duýgurlyga esaslanyp özüçe düşündirýär. Bu beýniniň çalt karara gelmegine we her bir duýduryşyň jikme-jik seljermesine wagt ýitirmezligine kömek edýär. Şeýle ýagdaý, aýratyn-da, adam howp bilen ýüzbe-ýüz bolanda möhümdir.
Synag Seul Milli Uniwersitetiniň Neýrobiologiýa kafedrasynyň dosenti, professor Hýoýeon Şiniň ýolbaşçylygyndaky ylmy işgärler topary tarapyndan geçirildi.
Alymlar alty sany syçanyň beýnisindäki görüş gatlagynyň bir kiçi bölegine lazer ulanmak arkaly synag etdiler. Netijede, syçanlar özlerini hakykatda ýok zatlary görýän ýaly alyp bardylar. Bu bolsa, öz gezeginde çäkli sanly neýronlaryň işjeňleşdirilmeginiň has giň gerimli görnüş döredýändigini we onuň güýçli täsir edýändigini tassyklady. Las-Wegasdaky Newada uniwersitetiniň psihologiýa boýunça professory Jeýms Haýman bu ýagdaýy beýniniň dünýäniň hakyky görnüşine däl-de, onuň özüne peýdaly we oňaýly bolan görnüşine mätäçdigi bilen düşündirýär.
Barlaglardan çen tutsaň, hakykatyň ýoýulmagy iň irki tapgyrlarda – görnüşiň görüş gatlagyna ýeten wagtynda başlanýar. Beýni duýduryşlary süzgüçden geçirýär we özüçe düşündirýär, şeýdibem howaýylyk döredýär. Hut şonuň üçin hem adamlar dünýäni özbaşdak, beýniniň düşündirişi bolmazdan görüp bilmeýärler.
