Arkadag şäherindäki umumy bilim berýän mekdebini döwrebaplaşdyrmak we ony daşary ýurt dillerini öwredýän ýöriteleşdirilen mekdebe öwürmek meýilleşdirilýär. Bu barada 10-njy ýanwarda türkmen halkynyň Milli Lideri Gurbanguly Berdimuhamedowyň Arkadag şäherine amala aşyran iş saparynyň barşynda şäheriň häkimi G.Mämmedowa maglumat berdi. Bu barada “Watan” habarlar gepleşiginde habar berildi.
Gurbanguly Berdimuhamedow bu çözgüdi oňlap, daşary ýurt dillerini öwredýän ýöriteleşdirilen mekdebiň ähli düzümleriniň ýokary derejede enjamlaşdyrylmagy, lingafon otaglarynyň we beýleki okuw otaglarynyň ýokary halkara görkezijilerine laýyk gelmegi bilen baglanyşykly meselelere aýratyn ähmiýet berilmelidigini belledi. Şunda dünýäniň ösen tejribesiniň we häzirki zaman ylmynyň gazananlarynyň talabalaýyk özleşdirilmegi möhüm wezipe bolup durýar.
Şeýle-de türkmen halkynyň Milli Lideri bu mekdebiň ýaşlary bakalawriat, magistratura ýaly ugurlara ugrukdyrmakda ýöriteleşdirilen mekdep bolmalydygyny aýratyn nygtady. Bu mekdebi tamamlan okuwçylar öz niýet eden hünäriniň eýesi bolmakda uly mümkinçiliklere eýe bolarlar.
Munuň özi türkmen ýaşlarynyň dil öwrenmegi we dünýä ylmyna çuňňur aralaşmagy bilen baglanyşykly meseleleriň oňyn çözülmegine täsirini ýetirer. Şu maksat bilen, mekdep binasynyň häzirki zamanyň ösen talaplaryna laýyk derejede döwrebaplaşdyrylmagyna hemmetaraplaýyn we örän jogapkärçilikli çemeleşilmelidir diýip, Gurbanguly Berdimuhamedow belledi we bu babatda özüniň degerli maslahatlaryny berdi.
