2026-njy ýyl Türkmenistanda «Garaşsyz, baky Bitarap Türkmenistan — bedew batly at-myradyň mekany» diýlip yglan edildi. Prezident Serdar Berdimuhamedow 26-njy dekabrda geçirilen giňişleýin Hökümet mejlisinde täze ýylyň şygaryny hem-de nyşanyny tassyklady. Bu barada “Watan” habarlar gepleşiginde habar berildi.
Mejlisiň barşynda Türkmenistanyň Mejlisiniň Başlygy D.Gulmanowa 2026-njy ýylyň şygaryny we nyşanyny kesgitlemek boýunça ýerine ýetirilen işleriň netijeleri barada maglumat berdi.
Bellenilişi ýaly, halk wekillerinden, ýurdumyzyň iri jemgyýetçilik birleşiklerinden, zähmetkeş toparlaryndan we raýatlarymyzdan gelip gowşan teklipleriň esasynda, 2026-njy ýyly “Garaşsyz, baky Bitarap Türkmenistan – bedew batly at-myradyň mekany” diýip atlandyrmak barada Mejlisiň karary taýýarlanyldy. Şeýle hem Türkmenistanyň Prezidentiniň garamagyna geljek ýylyň nyşany hödürlenildi.
Serdar Berdimuhamedow Türkmenistanyň Mejlisiniň agzalarynyň halkymyz bilen bilelikde geljek ýylyň şygaryny hem-de nyşanyny teklip edýändiklerini aýdyp, bu teklibi goldady.
Mälim bolşy ýaly, Türkmenistanda her ýyly döwrebap atlandyrmak boýunça ýylyň şygary yglan edilýär we nyşany kabul edilýär. 2025-nji ýyl «Halkara parahatçylyk we ynanyşmak ýyly», 2024-nji ýyl «Pähim-paýhas ummany Magtymguly Pyragy» ýyly, 2023-nji ýyl «Arkadag Serdarly bagtyýar ýaşlar ýyly» diýlip yglan edildi.
