22-nji dekabrda Prezident Serdar Berdimuhamedow Russiýa Federasiýasyna iş saparynyň çäklerinde Garaşsyz Döwletleriň Arkalaşygyna agza ýurtlaryň döwlet Baştutanlary bilen bilelikde «Döwlet Ermitaž Muzeýine» aýlanyp gördi. Bu barada “Watan” habarlar gepleşiginde habar berildi.
GDA agza ýurtlaryň döwlet Baştutanlary, ilki bilen, muzeýiň birinji gatynda ýerleşýän «Altyn hazyna» zalyna baryp gördüler. Bu ýerde antik döwrüň zergärleriniň ýasan altyn şaý-sepleri görkezilýär. Şolaryň hatarynda gadymy skif halkyna degişli 2 müň ýyllyk altyn önümleri nepisligi bilen haýran galdyrýar.
Muzeýiň ikinji gatynda ýerleşýän Orta Aziýa zalynda Beýik Ýüpek ýolunyň taryhy bilen tanyşmak bolýar. Ekspozisiýa asyrlaryň dowamynda medeniýetleriň arasyndaky kemala gelen gatnaşyklar bilen tanyşmaga mümkinçilik berýär.
Soňra döwlet Baştutanlary Beýik Britaniýanyň we Fransiýanyň sungaty bilen tanyşdyrýan zallara aýlanyp gördüler. Bu ýerde Günbataryň meşhur suratkeşleriniň we heýkeltaraşlarynyň eserleri bilen tanyşmak bolýar.
Muzeý bilen tanyşlygyň ahyrynda döwlet Baştutanlary «Leonardo da Winçi» zalyna baryp gördüler. Bu ýerde Ýewropanyň Galkynyş döwrüniň beýik ussadynyň 20-den gowrak eseri saklanylýar. Bu sungat eserleri çeperçilik ussatlygy we çuňňur many-mazmuny bilen tapawutlanýar.
Muzeý bilen tanyşlyk tamamlanandan soňra GDA agza ýurtlaryň döwlet Baştutanlarynyň ýokary derejeli resmi däl duşuşygy geçirildi.
