19-njy dekabrda Aşgabatda Birleşen Milletler Guramasynyň binasynda Bütindünýä Saglygy Goraýyş Guramasynyň (BSGG) goldawy bilen, Türkmenistanda «Bitewi saglyk» çemeleşmesini durmuşa geçirmek boýunça Milli pudagara utgaşdyryjy komitetiň 4-nji mejlisi geçirildi.
Bu komitet bilelikdäki çäreleri utgaşdyrmak, maglumat alşygyny ýola goýmak we bu ugurdaky başlangyçlary netijeli ornaşdyrmak maksady bilen döredildi. Onuň düzümine ýurdumyzyň ministrlikleriniň we pudaklaýyn dolandyryş edaralarynyň wekilleri girýär.
Mejlisiň dowamynda Döwlet weterinariýa gullugynyň, Saglygy goraýyş we derman senagaty ministrliginiň hem-de Daşky gurşawy goramak ministrliginiň milli utgaşdyryjylary häzirki wagtda gazanylan ösüşler barada hasabat berdiler.
Hususan-da, Türkmenistanyň Oba hojalyk ministrliginiň ýanyndaky Döwlet weterinariýa gullugynyň «Bitewi saglyk» boýunça milli utgaşdyryjysy, halkara we ylmy aragatnaşyklar bölüminiň başlygy Arslan Soltanmyradow öz çykyşynda laboratoriýa kuwwatyny ösdürmek, zoonoz keselleriniň öňüni almak, weterinariýa hünärmenlerini okatmak we halkara standartlaryny ornaşdyrmak, şeýle hem pudagara hyzmatdaşlyk barada giňişleýin durup geçdi. Döwlet weterinariýa gullugy özüniň tejribesi, bölümler ulgamy we laboratoriýa binýady arkaly zoonoz kesellerini irki döwürde ýüze çykarmaga we olara garşy netijeli çäreleri görmäge uly goşant goşýar.
Komitetiň esasy wezipeleri — hereketleri utgaşdyrmakdan, döwlet syýasatyny goldamakdan we «Bitewi saglyk» çemeleşmesini durmuşa geçirmek üçin milli kuwwaty berkitmekden ybaratdyr.
