18-nji dekabrda Türkmenistanyň ÝHHG-däki wekiliýeti Wenada Guramanyň Hemişelik Geňeşinde çykyş edip, her ýyl 12-nji dekabrda bellenilýän Halkara Bitaraplyk gününiň ähmiýetini nygtady. Bu barada Türkmenistanyň DIM-niň saýtynda habar berilýär.
Öz çykyşynda Türkmenistanyň wekili bitaraplygyň ynanyşmagy berkitmäge, gapma-garşylyklaryň öňüni almaga we hyzmatdaşlygy ösdürmäge gönükdirilen parahatçylygyň işjeň guralydygyny belledi. Wekiliýet bitaraplygyň dialogy, araçylygy we özara düşünişmegi pugtalandyrmaga ýardam edýändigini nygtady, bu bolsa häzirki sebitleýin we ählumumy şertlerde aýratyn möhümdir.
Türkmen tarapy gatnaşyjy döwletlere Halkara parahatçylyk we ynanyşmak ýyly mynasybetli we dialog, öňüni alyş diplomatiýasy we toplumlaýyn howpsuzlyk meselelerine bagyşlanan ýokary derejedäki Halkara maslahatynyň netijeleri barada maglumatlary ýetirdi.
Wekilýet şeýle hem ÝHHG-niň Baş sekretary Feridun Sinirlioglunyň ýakynda Aşgabada amala aşyran saparyny belledi, bu sapar taraplaryň öňüni alyş diplomatiýasy, sebitleýin baglanyşyk we ekologiýa howpsuzlygy babatda hyzmatdaşlygy has-da çuňlaşdyrmaga ygrarlydygyny tassyklady.
Şol bir wagtyň özünde, Türkmenistan bitaraplyk we oňyn goşulyşmazlyk ideýasynyň geljekki ara alyp maslahatlaşmalarda, şol sanda 2026-njy ýylda Şweýsariýanyň başlyklyk döwründe degişli derejede üns beriljekdigine umyt bildirdi. Bu duşuşyk ýylyň iň soňky duşuşygy bolandygy sebäpli, Türkmenistan Finlýandiýanyň başlyklygyna 2025-nji ýylda ýokary derejeli we inklýuziw ýolbaşçylyk edendigi üçin minnetdarlyk bildirip, onuň dialogy we Helsinki ýörelgelerini ösdürmäge goşan goşandyny belledi.
Çykyşynyň ahyrynda türkmen tarapy ählumumy we durnukly howpsuzlygy pugtalandyrmaga goşant goşmak arkaly, ÝHHG-niň çäklerinde we ondan daşarda bitaraplyk, parahatçylyk we ynanyşmak gymmatlyklaryny öňe sürmegi dowam etdirmäge taýýardygyny tassyklady.
