20-nji dekabrda Prezident Serdar Berdimuhamedow Ýaponiýa iş saparynyň maksatnamasy tamamlanandan soňra, Tokio şäheriniň Haneda halkara howa menzilinden ýurdumyza ugrady. Birnäçe sagatdan döwlet Baştutanynyň uçary Aşgabadyň Halkara howa menziline gelip gondy. Bu barada “Watan” habarlar gepleşiginde habar berildi.
Öň habar berşimiz ýaly, şol gün Prezident Serdar Berdimuhamedow “Merkezi Aziýa – Ýaponiýa” dialogynyň ilkinji sammitine gatnaşdy we birnäçe möhüm teklipleri beýan etdi.
Sammite gatnaşyjylar şeýle hem energiýa serişdelerini ibermegiň durnukly zynjyrlaryny pugtalandyrmak, Hazarüsti halkara ulag geçelgesini ösdürmek, senagat we beýleki ulgamlara emeli intellekt tehnologiýalaryny ornaşdyrmak, Merkezi Aziýada wodorod energetikasy tehnologiýalaryna maýa goýumlary çekmek, medeni we akademiki alyşmalary ösdürmek bilen baglanyşykly meseleleri ara alyp maslahatlaşdylar.
Duşuşygyň jemleri boýunça «Merkezi Aziýa + Ýaponiýa» Dialogynyň Sammitiniň Tokio Jarnamasy hem-de ykdysadyýet we energetika babatda ministrler derejesindäki Bilelikdäki Beýannamasy kabul edildi.
Şeýle hem şol gün sammite gatnaşyjy wekiliýet Baştutanlary “Merkezi Aziýa – Ýaponiýa” dialogynyň işewürlik maslahatynyň plenar mejlisine gatnaşdylar.
Plenar mejlisde Ýaponiýanyň Premýer-ministri Sanae Takaiti çakylygy kabul edip sammite gatnaşandyklary üçin Merkezi Aziýa ýurtlarynyň döwlet Baştutanlaryna hoşallyk bildirip, şu gezekki duşuşygyň netijeleri boýunça gazanylan ylalaşyklaryň “Merkezi Aziýa – Ýaponiýa” dialogynyň çäklerindäki hyzmatdaşlygy mundan beýläk-de ugurlaryň giň gerimi boýunça ösdürmäge täze itergi berjekdigine ynam bildirdi.
Soňra plenar mejlisiň dowamynda gol çekilen ikitaraplaýyn resminamalary yglan etmek dabarasy boldy.
Şeýle hem işewürlik maslahatynyň dowamynda “Ýaşyl energetika we durnuklylyk”, “Sanly özgertme we özara baglanyşyk”, “Maliýe, adam serişdeleri we jemgyýetçilik ulgamynyň işewürligi ösdürmekde eýeleýän orny” atly mowzuklaýyn mejlisler geçirildi.
Foruma türkmen tarapyndan ýurdumyzyň degişli döwlet düzümleriniň ýolbaşçylary, şeýle hem Türkmenistanyň Senagatçylar we telekeçiler birleşmesiniň giň wekilçilikli düzümi gatnaşdy.
