OpenAI kompaniýasy gönüden-göni ChatGPT çat-botunyň interfeýsine girizilen programmalaryň katalogyny hödürledi. Täze çözgüt ulanyjylara çatdan çykmazdan üçünji tarap hyzmatlaryny birikdirmäge, aýdym-sazy dolandyrmaga ýa-da resminamalar bilen işlemäge mümkinçilik berýär diýip, The Verge ýazýar.
Mysal üçin, Apple Music-iň birleşdirilmegi aýdym gözlemäge we pleýlist döretmäge mümkinçilik berýär. DoorDash hyzmaty reseptler boýunça satyn almaly zatlary meýilleşdirmäge kömek edýär, Dropbox-yň birikdirilmegi bolsa faýllary seljermäge we olaryň mazmunyny umumylaşdyrmaga mümkinçilik berýär.
Katalogdaky ähli programmalar kategoriýalar boýunça bölündi. Guraly işjeňleşdirmek üçin ulanyja sanawdan programmany saýlamak, «Connect» düwmesini basmak we elýeterlilige rugsat bermek gerek, şondan soň çatda saýlanan programmanyň funksiýalary elýeterli bolar.
OpenAI işläp düzüjilere öz programmalaryny sanawa goşmaga rugsat berdi. Kompaniýa taýýar gurallary, kod mysallaryny we programma üpjünçiligini döretmek boýunça görkezmeleri hödürledi. Häzirki tapgyrda monetizasiýa daşarky salgylanmalaryň üsti bilen amala aşyrylýar, ýöne neşiriň maglumatlaryna görä, kompaniýa içerki töleg gurallaryny girizmek mümkinçiligini öwrenýär.
