15-nji dekabrda Prezident Serdar Berdimuhamedowyň tabşyrygy boýunça Mejlisiň Başlygy D.Gulmanowa Ekwatorial Gwineýa Respublikasynyň Türkmenistandaky Adatdan daşary we Doly ygtyýarly ilçisi Lusiano Nkogo Ndong Aýekabadan ynanç hatyny kabul etdi.
Söhbetdeşligiň barşynda ilçi Türkmenistanyň durmuş ugurly içeri syýasatynyň ileri tutulýan ugurlary, ýurdumyzyň oňyn Bitaraplyk, parahatçylyk söýüjilik we dünýäniň ähli döwletleri, şol sanda Afrika ýurtlary bilen netijeli hyzmatdaşlyk ýörelgelerine esaslanýan daşary syýasaty bilen tanyşdyryldy. Duşuşygyň dowamynda ikitaraplaýyn hyzmatdaşlygyň mümkinçilikleri barada pikir alşyldy. Şeýle-de ilçä Mejlisiň düzümi we onuň alyp barýan işleri, Türkmenistanda durmuşa geçirilýän giň gerimli durmuş-ykdysady özgertmeler hakynda gürrüň berildi.
Duşuşygyň ahyrynda diplomat Türkmenistanda Ekwatorial Gwineýa Respublikasyna wekilçilik etmegiň özi üçin uly hormatdygyny nygtap, iki ýurduň arasyndaky gatnaşyklary mundan beýläk-de ösdürmek üçin ähli tagallalary etjekdigine ynandyrdy.
Şol gün ilçi şeýle hem Türkmenistanyň daşary işler ministriniň orunbasary Serdar Muhammetdurdyýewe ynanç hatlarynyň nusgalaryny gowşurdy.
Taraplar hyzmatdaşlygyň şertnama-hukuk binýadyny berkitmegiň mümkinçiliklerini ara alyp maslahatlaşdylar.
Mundan başga-da, taraplar söwda-ykdysady hem-de medeni gatnaşyklaryň ýola goýulmagynyň mümkinçiliklerini ara alyp maslahatlaşdylar.
Ilçi diplomatik işini Moskwa şäherinde oturýan ýerinden alyp barar.
