Prezident Serdar Berdimuhamedow Bahreýniň Patyşasy Hamad bin Isa Al Halifa we ýurduň ähli halkyna Bahreýn Patyşalygynyň Milli güni mynasybetli mähirli gutlaglaryny, iň gowy arzuwlaryny iberdi.
“Türkmenistan bilen Bahreýn Patyşalygynyň arasynda ýyllaryň dowamynda emele gelen köpugurly gatnaşyklara ýokary baha berýäris we bu hyzmatdaşlygyň geljekde iki ýurduň halklarynyň bähbidine mundan beýläk-de ösdüriljekdigine ynam bildirýäris” diýip, döwlet Baştutany hatynda belleýär.
Prezident Serdar Berdimuhamedow mümkinçilikden peýdalanyp, Bahreýniň Patyşasy Hamad bin Isa Al Halifa tüýs ýürekden berk jan saglyk, abadançylyk, bagtyýarlyk, Bahreýn Patyşalygynyň doganlyk halkyna bolsa parahatçylyk, öňegidişlik we rowaçlyk arzuw etdi.
Bahreýniň Milli güni 16-njy dekabrda bellenilýär. Bu sene ýurduň taryhyndaky möhüm wakalar bilen baglanyşdyrylýar: 1971-nji ýylda Bahreýn garaşsyzlygyny yglan etdi, şeýle hem häzirki zaman Bahreýn döwletiniň emele gelmeginde möhüm orun eýelän şeýh Isa bin Salman Al-Halifanyň tagta geçmeginiň senesine gabatlanylýar.
