Afrikadaky pingwinleriň ýeke-täk görnüşi Günorta Afrikanyň kenarýaka suwlarynda balyklaryň düýpli azalmagy sebäpli ýok bolmagyň bärsine bardy. Häzirki ýagdaý saklansa, bu görnüş 2036-njy ýyla çenli ýok bolup biler.
Bu barada Günorta Afrika Respublikasynyň (GAR) Tokaý we balykçylyk, daşky gurşawy goramak ministrliginiň we Beýik Britaniýanyň Ekseter uniwersitetiniň bilelikdäki hasabatynda habar berilýär.
Soňky otuz ýylyň dowamynda Afrika pingwinleriniň sany 95% azaldy.
Esasy sebäp hökmünde pingwinleriň iýmitiniň esasy bölegini düzýän sardinalaryň we ançouslaryň sanynyň azalmagyndan döreýän açlyk görkezildi. Doly öwrenilmedik sebäplere görä, bu balyklar guşlaryň höwürtgeleri ýerleşýän GAR-yň we Namibiýanyň kenarýaka käbir sebitlerini terk etdiler. 2004-nji ýyldan 2011-nji ýyl aralygynda diňe GAR-da ýeterlik iýmitiň ýoklugy sebäpli 60 müňden gowrak jandar öldi.
Günorta Afrikanyň hökümete degişli bolmadyk "BirdLife South Africa" atly daşky gurşawy goraýyş guramasynyň hasaplamalaryna görä, häzirki wagtda Afrika yklymynyň tebigatynda takmynan 20 müň pingwin ýaşaýar. Uly guş 2,2-3,5 kg agramynda bolup, beýikligi 70 sm ýetýär we iýmit gözleginde 120 km-e çenli ýüzüp bilýär.
Pingwinleriň esasy tebigy duşmanlary akulalar, deňiz pişikleri, uly maýmynlar, şeýle hem çagalary awlaýan çarlaklardyr.
