Türkmenistanyň Daşary işler ministrliginiň Halkara gatnaşyklary institutynda ÝUNESKO-nyň «Parahatçylyk medeniýeti» kluby hem-de «Ýaş tebigatçy» jemgyýetçilik guramasy tarapyndan bilelikde guralan «Ekologiýa abadançylygy — Zeminiň gözelligi» atly eko-kwest aksiýasy geçirildi.
Çäräniň esasy maksady ýaşlaryň ekologik sowatlylygyny ýokarlandyrmakdan, tebigata aýawly garaýşy kemala getirmekden hem-de daşky gurşawy we tebigy mirasy gorap saklamak ugrundaky jogapkärçiligini artdyrmakdan ybarat boldy.
Aksiýanyň başynda «Ýaş tebigatçy» guramasynyň hünärmenleri Daşky gurşawy goramagyň Bütindünýä gününe, tebigy baýlyklary gorap saklamaga we ekologiýa diplomatiýasynyň ornuna bagyşlanan wagyz-nesihat duşuşygyny geçirdi. Duşuşykda Türkmenistanyň ÝUNESKO bilen hyzmatdaşlygyna, milli mirasy we tebigy baýlyklary gorap saklamak boýunça alnyp barylýan işlere aýratyn üns berildi.
Çykyşlarda ýurduň halkara ekologik konwensiýalaryna gatnaşmagy, «ýaşyl» ykdysadyýeti ösdürmegi, çölleşmä garşy göreşmek we biologik dürlüligi gorap saklamak boýunça görülýän çäreler barada bellenilip geçildi. Şeýle işleriň ýaşlarda ekologik medeniýetiň kemala gelmegine ýardam edýändigi nygtaldy.
Soňra gatnaşyjylar institutyň çägini abadanlaşdyrmak işlerine gatnaşdy. Talyplar baglara ideg etdi, ýaşyl zolaklary abadanlaşdyrmak we ýanaşyk ýerleri arassalamak işlerini ýerine ýetirdi.
Çäräniň iň işjeň gatnaşyjylary «Ýaş tebigatçy» jemgyýetçilik guramasy tarapyndan höweslendiriji sowgatlar bilen sylaglandy.
Guramaçylaryň bellemegine görä, bu hili çäreler ýaşlaryň ekologik jogapkärçiligini ösdürmäge we sagdyn durmuş ýörelgesini wagyz etmäge ýardam edýär.
