Jeff Bezos we Loren Sançes poliesterdir pagta ýaly materiallaryň ornuny tutjak ekologiýa taýdan arassa önümleri işleýän ylmy merkezleri goldamak üçin 34 million dollar serişde goýberdiler.
«Bezos Earth Fund» gaznasynyň üsti bilen geçirilen bu serişdeler tebigatda öz-özünden çüýräp bilýän dokma süýümlerini, sintetik ýüpegi we beýleki innowasion materiallary döretmäge gönükdiriler. Täze materiallar moda senagatynyň daşky gurşawa ýetirýän zyýanly täsirini azaltmaga kömek eder.
Ekologlar Amazon korporasiýasynyň işiniň tebigaty uly möçberde hapalaýandygyna ünsi çekip, bu ädimi tankytlaýarlar. Emma gaznanyň wekilleri «Bezos Earth Fund» gaznasynyň özbaşdakdygyny we Amazon-dan garaşsyz işleýändigini tekrarlaýarlar.
Amazon kompaniýasy hem öz gezeginde 2040-njy ýyla çenli howa goýberilýän zyýanly galyndylary doly görnüşde iň pes derejä düşürmek meýilnamasynyň bardygyny mälim edýär.
