Özbegistanda ýaşaýjylara her gün ýörän ädimleri üçin pul sylaglaryny berýän «Eko-işjeň raýat» atly sanly platforma işe başlady.
Bu taslama ýurduň prezidenti Şawkat Mirziýoýewiň karary bilen amala aşyrylyp, onuň esasy maksady adamlaryň arasynda sagdyn durmuş ýörelgesini ornaşdyrmak we ekologiýa medeniýetini ösdürmekdir. Programma öz ulanyjylaryndan günde iň azyndan 10 müň ädim ätmegi talap edýär we ony ýerine ýetirenlere pul baýragyny berýär.
Häkimiýetler bu adaty bolmadyk çäräniň üsti bilen adamlaryň saglygyny goramak, şeýle-de olaryň işe, dükana ýa-da okuwa barýan aralyklaryny takside ýa-da öz ulagynda däl-de, pyýada ýöräp gitmäge höweslendirmek we şonuň netijesinde ýollardaky ulaglary selçeňledip, howanyň zyýanly gazlar bilen hapalanmagynyň öňüni almak isleýärler.
Häzirki wagtda bu ykjam programmany smartfonlaryň meşhur programma dükanlaryndan (App Store, Google Play) ýükläp almak bolar. Ekologiýa baradaky döwlet komitetiniň habar bermegine görä, hünärmenler ulanyjylara bonuslary hasaplamagyň tehniki ulgamyny kämilleşdirmegi dowam edýärler. Bu taslamany maliýeleşdirmek we adamlara pul tölemek üçin ýörite gaznadan her ýyl 10 milliard sum (takmynan 830 müň dollar) sarp edilmegi göz öňünde tutulýar.
Özbegistanda şuna meňzeş taslama öň, 2021-nji ýylda «Sagdyn durmuş ýörelgesi» taslamasynyň çäginde-de girizilipdi. Şonda her günki pyýada ýöremek kadasyny ýerine ýetiren her bir adama 3 müň sum berilýärdi. Emma 2022-nji ýylyň baharynda ol maksatnama ýapyldy. Indi bolsa häkimiýetler ony täze ekologiýa strategiýasynyň çäginde has-da kämilleşdirip, gaýtadan ýola goýdular.
