Ýaponiýanyň günbatarynda awtonom nawigasiýa tehnologiýasyny ulanýan dünýäde ilkinji ýolagçy gämisi peýda boldy. Olympia Dream Seto atly gämi Okaýama bilen Sýodosima adasynyň arasynda gatnap başlady diýip, Kyodo agentligi habar berýär.
Gämi döwlet ygtyýarnamasyny alandan soň, ýarym awtonom režimde işe başlady diýip, gämi gatnawynyň meseleleri bilen meşgullanýan Nippon Foundation gaznasy belleýär.
Gaznanyň ýerine ýetiriji müdiri awtonom gäminiň işe girizilmeginiň Ýaponiýada işçi güýjüniň ýetmezçilik etmek meselesine çözgüt bolup biljekdigini we ýolagçylary uzak adalara gatnatmaga kömek etjekdigini belledi.
Synaglar gäminiň öňde barýan gämini “görmäge” we ugruny özbaşdak üýtgetmäge ukyplydygyny görkezdi.
Bu başlangyç Nippon Foundation gaznasynyň we 50-den gowrak kompaniýanyň gatnaşmagynda ekipažsyz gämileri täjirçilik taýdan ulanmak boýunça has uly taslamanyň bir bölegidir. Şeýle tehnologiýalaryň ulanylmagy logistikany kämilleşdirip, deňiz heläkçilikleriniň sanyny azaldar diýlip garaşylýar.
2026-njy ýylyň aprel aýyna çenli ýene üç gäminiň, şol sanda meňzeş awtonom dolandyryş funksiýalary bolan konteýner gatnadyjy gäminiň täjirçilik ulanylyşyna başlamak meýilleşdirilýär.
